Mo‘g‘ulistonning Xovd viloyatida o‘latga o‘xshash kasallik belgilari aniqlangani sababli, hududda vaqtincha cheklov choralar joriy etildi. Bu haqda Zamin.uz xabar berdi.
Mahalliy ma’muriyatning ma’lumotiga ko‘ra, Bulgan qishlog‘ida o‘latga xos simptomlar bilan kasallik holatlari qayd etilgan. Shundan so‘ng, hokimiyat tomonidan ommaviy tadbirlarni to‘xtatish, maktablarda o‘quv jarayonini masofaviy shaklda davom ettirish hamda zarur profilaktika va dezinfeksiya ishlarini amalga oshirish to‘g‘risida qaror qabul qilindi.
Xovd viloyatida fuqarolarning harakati cheklangan, transport vositalari kirish-chiqishi nazoratga olingan. Ayrim savdo nuqtalari va umumiy ovqatlanish joylari faoliyati vaqtincha to‘xtatilgan.
Tibbiyot muassasalari yuqumli kasallikka chalinganlar bilan aloqada bo‘lgan shaxslarni kuzatib boradi. Avvalroq, Xubsugul viloyatida ham o‘lat tarqalishi xavfi sababli qat’iy cheklovlar joriy qilingan edi.
Bu hududda ham aholining harakati, transport qatnovi, bozorlar va ovqatlanish muassasalari faoliyati vaqtincha cheklangan. Sog‘liqni saqlash xizmati ma’lumotlariga ko‘ra, 2025 yil 12 sentyabr holatiga ko‘ra, o‘lat kasalligiga chalingan 3 bemor bilan yaqin aloqada bo‘lgan 110 nafar fuqaro shifokorlar nazoratida.
Ularning har biri alohida ro‘yxatga olingan va tibbiy kuzatuv ostida. Qo‘shimcha ma’lumotlarga ko‘ra, 2025 yil avgust holatiga ko‘ra, Mo‘g‘ulistonning 17 viloyatidagi 130 aholi punktida o‘lat o‘choqlari aniqlangan.
2014 yildan 2024 yilgacha mamlakatda jami 20 kishi o‘lat kasalligiga chalingan, ulardan 9 nafari vafot etgan. Bu holatlar sog‘liqni saqlash sohasida ehtiyot choralarini kuchaytirishni talab qilmoqda.
