Starmer: Bayroq zo‘ravonlik ramzi emas, bag‘rikenglik belgisi
Buyuk Britaniya bosh vaziri Keir Starmer mamlakat bayrog‘ining zo‘ravonlik va bo‘linish ramzi sifatida ishlatilishiga yo‘l qo‘yilmasligini ma’lum qildi. Bu haqda Zamin.uz xabar berdi.
Uning so‘zlariga ko‘ra, bayroq Britaniyaning turli millat va madaniyatlarini ifodalaydi, shuningdek, hech kim o‘z kelib chiqishi yoki teri rangi sababli ko‘chalarda xavfsizlikdan mahrum bo‘lmasligi kerak. Bu fikrlar London markazida bo‘lib o‘tgan yirik namoyishlardan so‘ng bildirildi.
Namoyishda Tommi Robinson tashabbusi bilan taxminan 150 ming kishi qatnashdi. Harakat davomida politsiya bilan to‘qnashuvlar yuz berdi, natijada 26 nafar politsiyachi jarohat oldi va 24 kishi hibsga olindi.
Starmer tinch namoyish huquqi hurmat qilinishini, ammo politsiyaga hujum qilish va fuqarolarga bosim o‘tkazishga yo‘l qo‘yilmasligini ta’kidladi. U Britaniya jamiyati bag‘rikenglik va hurmat qadriyatlariga asoslanganligini eslatdi.
Namoyishlarda minglab odamlar bayroqlar ko‘tarib yurishdi. Politsiya tartibni saqlash uchun mingdan ortiq xodimni safarbar qildi va qo‘shimcha kuchlarni jalb etdi.
Hodisalar bo‘yicha tergov ishlari davom etmoqda.
