Xitoyda chiqindi yoqish zavodlari faoliyati susaymoqda
Xitoyda so‘nggi vaqtlarda chiqindi yoqish zavodlarida chiqindilar yetishmasligi sababli faoliyatni to‘xtatish holatlari kuzatilmoqda. Bu haqda Zamin.uz xabar berdi.
Financial Times nashri bu haqida ma’lumot berdi. Ma’lumotlarga ko‘ra, chiqindilar hajmining kamayishi iste’mol darajasining pasayishi, aholi sonining sekin kamayishi hamda chiqindilarni samarali boshqarish tizimining joriy etilishi bilan bog‘liqdir.
O‘n yil oldin Xitoy shaharlari chiqindilar muammosidan xalos bo‘lish maqsadida katta sarmoya kiritgan edi. Milliardlab dollar mablag‘ hisobiga yuzlab yangi zavodlar barpo etildi.
Ularning asosiy vazifasi chiqindilarni qayta ishlash va yoqish orqali atrof-muhitni muhofaza qilish edi. Biroq vaqt o‘tishi bilan sarflangan mablag‘larga qaramay, ba’zi zavodlarning ishlab chiqarish quvvati talabdan oshib ketdi.
Hozirda ayrim korxonalar chiqindi hajmining yetishmasligi sabab faoliyatini to‘xtatishga majbur bo‘lmoqda. Boshqalar esa kerakli xomashyoni boshqa hududlardan sotib olish bilan cheklanmoqda.
Bu holat chiqindilarni boshqarish tizimining muvaffaqiyati va aholi hayot tarzidagi o‘zgarishlarni ko‘rsatadi.
