AQSH va Xitoy TikTok egasini kelishmoqda

AQSH moliya vaziri rasmiy bayonotida Vashington va Xitoy TikTokning Amerikadagi faoliyatiga mahalliy egalik masalasida kelishuvga erishgani ma’lum qilindi. Bu haqda Zamin.uz xabar berdi.

Vazir Skott Bessentning so‘zlariga ko‘ra, ushbu kelishuvga prezident Donald Tramp va Xitoy rahbari Si Szinpin juma kuni imzo qo‘yadi. Biroq Pekin bu ma’lumotni hali tasdiqlamagan.

Agar Xitoy kelishuvni qabul qilmasa, 17-sentyabr kuni AQSH hududida TikTok platformasi to‘liq bloklanishi mumkin. Trampning ta’kidlashicha, Madridda o‘tgan savdo muzokaralari samarali kechdi va yoshlar uchun muhim bo‘lgan platforma taqdiri yuzasidan zarur kelishuvga erishildi.

TikTokning xitoylik egasi AQSHdagi operatsiyalari uchun xaridor topishi shart qilib qo‘yildi. Aks holda, ilova mamlakatda taqiqlanishi ehtimoli yuqori.

Ma’lumot uchun, AQSH Oliy sudi yanvar oyida o‘tgan yil qabul qilingan qonunni tasdiqlagan. Unga ko‘ra, kompaniya operatsiyalarini topshirmasa, TikTok butunlay taqiqlanadi.

AQSH Adliya vazirligi esa platformaning amerikalik foydalanuvchilarning shaxsiy ma’lumotlariga ega bo‘lishini milliy xavfsizlik uchun jiddiy tahdid deb baholaydi. TikTok rahbariyati bu ayblovlarni rad etib, AQSHdagi faoliyatlari mustaqil ekanligini va Xitoy hukumatiga ma’lumot uzatilmasligini ta’kidladi.

Shuningdek, taqiq amerikaliklarning so‘z erkinligi va ma’lumotlarini himoya qilishga salbiy ta’sir ko‘rsatishi mumkinligi bildirilmoqda. Bloklash qonuni kuchga kirgandan so‘ng, Tramp yanvar oyida taqiqni 75 kunga kechiktirishga rozilik bildirgan.

Keyinchalik muddat uch marta uzaytirilib, so‘nggi sana 17-sentyabrga belgilandi. Avvalroq TikTokning ehtimoliy xaridorlari sifatida Tesla asoschisi Ilon Mask, bloger va biznesmen MrBeast hamda investor Frenk Makkurt nomlari tilga olingan edi.

Hozirda ko‘zlar 17-sentyabrga qaratilgan bo‘lib, shu kunda platformaning va uning millionlab foydalanuvchilarining kelajagi aniqlanishi kutilmoqda.