Gruziyada “Tinder firibgar” nomi bilan tanilgan Saymon Leviyev, asl ismi Shimon Xayut, Batumi aeroportida hibsga olindi. Bu haqda Zamin.uz xabar berdi.
Bu haqda “The Jerusalem Post” nashri xabar berdi. Gruziya Ichki ishlar vazirligi ma’lumotlariga ko‘ra, Leviyev Interpolning xalqaro qidiruvi asosida qo‘lga olingan.
Uning advokati mijozining hibsga olinishi sababini hozircha tushunmayotganini aytib, u dunyo bo‘ylab erkin sayohat qilganini ta’kidladi. Saymon Leviyev o‘zini olmos biznesining vorisi deb tanishtirib, Tinder ilovasi orqali ayollarni aldab, ulardan katta miqdorda pul olgan.
U hayoti xavf ostida ekanini aytib, taxminan 10 million dollar miqdorida mablag‘ yig‘gan. 2019 yilda Isroilda firibgarlikda ayblanib, 15 oyga qamoqqa hukm qilingan, ammo besh oy o‘tib ozodlikka chiqarilgan.
Shundan so‘ng o‘zini biznes maslahatchisi deb ko‘rsatgan. Leviyevning qurbonlari moliyaviy zararlarini qoplash uchun kurashni davom ettirmoqda.
2022 yil yanvarida Netflix “The Tinder Scammer” nomli hujjatli filmni taqdim etdi. Unda Leviyev tomonidan aldangan uch ayol bilan suhbatlar aks etgan.
Film premeradan keyingi birinchi haftada qariyb 46 million marta ko‘rilib, platformaning eng mashhur filmlari qatoriga kirgan. Shuningdek, 2022 yil aprelida Ispaniya hukumati Leviyevni soxta hujjatlar ishlatgani uchun hibsga olish bo‘yicha order chiqargan.
Hozirda uning holati bo‘yicha tergov ishlari davom etmoqda.
