Afg‘onistonda Energetika va suv xo‘jaligi vazirligining yuqori martabali maslahatchisi Faruq A’zam ayollarni zilziladan zarar ko‘rgan Kunar viloyatiga hamshira sifatida yuborishni taklif qilgani uchun hibsga olindi. Bu haqda Zamin.uz xabar berdi.
Bu haqda Afghanistan International axborot manbasi xabar berdi. Ma’lumotlarga ko‘ra, Faruq A’zamning qo‘lga olinishi “Tolibon” yetakchisi Xibatulloh Oxundzoda buyurtmasi bilan amalga oshirilgan.
Hozirda u Kobuldagi maxsus nazorat idorasida saqlanmoqda va ishi harbiy sudga yuborilgan. Faruq A’zam ijtimoiy tarmoqlarda ayollar ta’limi va tibbiyot sohasida ularning ishtirokini qat’iy himoya qilgan.
U Meta platformasida ayol hamshiralarni Kunarga yuborish zarurligini ta’kidlab, bu orqali ayollarning jamiyatdagi rolini yanada muhim va kerakli ekanligini ko‘rsatmoqchi bo‘lgan. Shuningdek, u Afg‘oniston ichida va xorijda faoliyat yuritayotgan ayol sog‘liqni saqlash mutaxassislarini zilziladan jabrlangan aholiga yordam berishga chaqirgan.
Maslahatchi “Bizdagi bilimli va tajribali ayollar jamiyatdagi mavqeini mustahkamlash uchun tashabbus ko‘rsatishga va qurbonlik qilishga tayyormi? Agar tayyor bo‘lsa, aynan hozir shuning eng munosib vaqti” deb yozgan.
Ushbu voqea Afg‘onistonda ayollarning ijtimoiy hayotdagi ishtiroki va ularning huquqlariga munosabat borasidagi keskin vaziyatni yana bir bor ochiq-oydin ko‘rsatdi.
