AQShning Jorjiya shtatida o‘tkazilgan immigratsiya reydi davomida 300 dan ortiq janubiy koreyalik ishchi hibsga olindi. Bu haqda Zamin.uz xabar berdi.
Ular Hyundai va LG kompaniyalariga qarashli zavod qurilishida vaqtincha ishlayotgan edi. Ishchilarning so‘zlariga ko‘ra, qurolli ofitserlar ularni kishanlab, avtobuslarga olib ketgan.
AQSh rasmiylari ishchilarning noto‘g‘ri viza bilan ishlaganini ta’kidladi. Biroq keyinchalik ular jazolanishsiz mamlakatdan chiqib ketishga ruxsat oldi.
Bu kelishuv ishchilarga kelajakda yana AQShda ishlash imkonini beradi. Hibsga olingan ishchilar sovuq va og‘ir sharoitlarda saqlanganini aytdi.
Ular ichimlik suvi iflos bo‘lganini, ko‘pchiligi esa yotoqsiz qolib, stollarda uxlashga majbur bo‘lganini bildirdi. Janubiy Koreya hukumati inson huquqlari buzilgani yuzasidan tekshiruv boshladi.
Ushbu voqea AQSh va Janubiy Koreya o‘rtasidagi munosabatlarni taranglashtirdi. Chunki yaqinda Seul hukumati AQShda katta sarmoya kiritish bo‘yicha kelishuv imzolagan edi.
Ishchilarning bir qismi ruhiy zarba tufayli AQShga qaytishni istamasligini ma’lum qilmoqda.
