Shvetsiyada maktablarda mobil telefon taqiqlandi
Shvetsiya hukumati ta’lim tizimida muhim o‘zgarishlar kiritishga qaror qildi. Bu haqda Zamin.uz xabar berdi.
2026 yil kuzidan boshlab mamlakatdagi barcha maktablarda o‘quvchilarning mobil telefondan foydalanishi to‘liq taqiqlanadi. Ushbu qaror 7 yoshdan 16 yoshgacha bo‘lgan bolalarga taalluqlidir.
Har bir maktabda darslar boshlanishidan oldin o‘quvchilardan mobil telefonlar yig‘ib olinadi va faqat dars tugagach qaytariladi. Bu yangi tartibning asosiy maqsadi o‘quv muhitini samaraliroq qilish va bolalarning xavfsizligini ta’minlashdan iborat.
Shvetsiyadagi ushbu qaror Yevropaning boshqa davlatlarida qabul qilingan amaliyotlarga o‘xshashdir. Masalan, Daniyada yil boshida hukumat komissiyasi bolalar maskanlari va maktablarda mobil telefonlardan foydalanishni cheklashni tavsiya qilgan.
Ularning fikricha, 13 yoshgacha bo‘lgan bolalar smartfon yoki planshetga ega bo‘lmasligi lozim. Norvegiyada esa o‘tgan yili ijtimoiy tarmoqlardan foydalanish uchun qat’iy yosh chegarasi belgilandi.
Hukumat 15 yoshdan kichik bolalarga ijtimoiy tarmoqlardan foydalanishni taqiqlab, texnologiya kompaniyalarini yosh avlod miyasiga salbiy ta’sir ko‘rsatishda aybladi. Shuningdek, 2024 yil yanvar oyida Niderlandiyada deyarli barcha maktablarda smartfonlar taqiqlandi.
O‘tkazilgan tadqiqotlar natijasida bu tartib o‘quv muhitini sezilarli darajada yaxshilagani aniqlandi. So‘rovnoma ishtirokchilarining 75 foizi bolalarning diqqatini jamlash osonlashganini, 28 foizi esa ta’limdagi natijalarning yaxshilanganini qayd etdi.
Ushbu choralar ta’lim sifatini oshirish va yoshlarni ortiqcha texnologiya ta’siridan himoya qilishga qaratilgan.
