Bolsonaru sog‘ligi yomonlashib, shifoxonaga yotqizildi

Braziliyaning sobiq prezidenti Jair Bolsonaru sog‘lig‘i bilan bog‘liq muammolar sababli yana shifoxonaga yotqizildi. Bu haqda Zamin.uz xabar berdi.

Bu haqida uning o‘g‘li Flavio Bolsonaru ijtimoiy tarmoqdagi sahifasida ma’lum qildi. Unga ko‘ra, 16 sentyabr kuni kechqurun otasi o‘zini yomon his qilgan.

Ayniqsa, hiqichoq bo‘lishi, qon bosimining keskin pasayishi va ko‘ngil aynishi kuzatilgan. Shu sababli uni politsiya nazorati ostida DF Star klinikasiga olib borishgan.

Flavio bu vaziyatni favqulodda holat deb atadi. Sobiq prezidentning turmush o‘rtog‘i Mishel Bolsonaru ham erining bir qator tibbiy tekshiruvlardan o‘tganini va hozirda tomir orqali ukol olayotganini ma’lum qildi.

Eslatib o‘tamiz, Jair Bolsonaru yaqinda davlat to‘ntarishini rejalashtirishda ayblanib, sud tomonidan 27 yil 3 oyga ozodlikdan mahrum etilgan. Sud jarayonida sobiq prezident 2022 yilgi saylovlarda mag‘lub bo‘lgach, hokimiyatni ushlab qolish maqsadida konstitutsiyaga zid harakatlar qilgani aytilgan.

Bolsonaru esa o‘z aybini rad etib kelmoqda. Uning tarafdorlari va advokatlari bu qarorni siyosiy ta’qib sifatida baholamoqda.

Jair Bolsonaru Braziliya siyosatida eng bahsli va o‘ng qanotdagi yetakchilardan biri hisoblanadi. U 2019 yildan 2022 yilgacha mamlakatni boshqargan, keyingi saylovda Lula da Silvadan mag‘lub bo‘lgan.

Siyosatchi mag‘lubiyatini rasmiy tan olmagan bo‘lsa-da, lavozimini tark etgan. 2023 yil yanvar oyida uning tarafdorlari saylov natijalaridan norozi bo‘lib, Braziliya poytaxtida ommaviy namoyishlar va tartibsizliklar uyushtirgan.

Ular hukumat binolarini bosib olishga ham uringan, bu esa butun dunyoda katta e’tiborni tortgan. Sobiq prezident sog‘lig‘i bilan bog‘liq muammolarni avval ham ko‘p marta boshdan kechirgan.

U yetti yil oldin saylovoldi kampaniyasi paytida pichoqlangan va og‘ir jarohat olgan. Shundan beri bir necha bor shifoxonaga yotqizilgan.