Rossiya dronlari Polsha hududiga kirib keldi
2023-yil 10-sentyabrga o‘tar kechasi Rossiyaga tegishli 20 dan ortiq uchuvchisiz qurilmalar Polsha hududiga kirib keldi. Bu haqda Zamin.uz xabar berdi.
Ularning bir qismi urib tushirildi, qolganlarini ushlash maqsadida qiruvchi samolyotlar havoga ko‘tarildi. Bu voqea Ukraina bilan chegaradosh sharqiy hududda yashovchi aholini jiddiy xavotirga solmoqda, deb xabar beradi The Wall Street Journal.
Mahalliy aholi vakillaridan biri, Ala Vesolovska, ertalab nonushta tayyorlayotgan paytda uyi ustidan past balandlikda uchib o‘tgan dron tovushini eshitganini aytdi. Uning uyi Ukraina chegarasidan atigi 30 kilometr uzoqlikda joylashgan.
Shuningdek, 38 yoshli Katajina Jvigala bolalari bilan yashaydigan Vixalyov qishlog‘ida kuchli portlashga o‘xshash tovush eshitganini, keyinchalik bu dron ekanini tushunganini bildirdi. Uning o‘g‘li, “Ona, urush bizga ham keldimi?” deb so‘ragan.
The Wall Street Journal ta’kidicha, Rossiya dronlarining Polshaga kirib kelishi mamlakatda Ukrainadagi urushga bo‘lgan munosabatlarda yangi bosqichni boshlab berdi. Polsha allaqachon Rossiyaning qo‘poruvchilik harakatlarining nishoniga aylangan va bunday operatsiyalarning maqsadi Varshavaning Kiyevni qo‘llab-quvvatlashini susaytirishdir.
Ammo dronlar hujumi harbiy to‘qnashuv xavfini oshirmoqda. 2023-yil 13 sentyabr kuni Polsha qiruvchi samolyotlari yana havoga ko‘tarildi.
Rasmiy ma’lumotlarga ko‘ra, bu harakatlar profilaktik xarakterga ega edi. Shu kuni Lyublin shahri aeroporti vaqtincha yopildi.
Kshivovejba qishlog‘ida yashovchi Edita va Tomash Vechereklar esa telefonlariga “dron hujumi xavfi” haqida ogohlantirish kelgani haqida gapirdi. Ular hukumat aholini bunday vaziyatlarda qanday harakat qilish kerakligi haqida yetarlicha ma’lumot bermayotganidan norozi ekanini bildirdi.
Edita davlat tomonidan aholi uchun amaliy mashg‘ulotlar tashkil etilishi kerakligini ta’kidladi. Uning qizi esa, dron parchalari qishloqdagi uy tomiga tushganidan keyin uyning ikkinchi qavatida uxlashdan bosh tortmoqda.
Aholi hanuz rasmiy izoh kutmoqda. Ular “Osmonda nima bo‘ldi?
Nima uchun samolyotlar ko‘tarildi? Bu xavfli emasmi?” kabi savollarga javob izlamoqda.
WSJning yozishicha, bu voqea Polsha jamiyatini ikki qismga bo‘lgan. Ba’zilar ukrainlarga nisbatan hamdardlik yanada kuchayganini aytsa, boshqalar Kiyev Polshani mojaro tomon tortayotgani haqida fikr bildiradi.
Ayrimlar esa Rossiya tarafidan tarqatilgan “dronlarni ukrainlar maxsus Polshaga yo‘naltirgan” degan iddaolarni ham takrorlamoqda. Viriki-Volya qishlog‘i rahbari Bernard Blashchuk “Dezinformatsiya ham haqiqy xavfdir.
Biz Ukraina chegarasidan atigi 12 kilometrda yashaymiz. Shu sababli NATO qo‘shinlarini bu yerda ko‘rishni istayman”, dedi.
Uning qishlog‘ida dron parchalari uylardan biriga zarar yetkazgani ham ma’lum qilindi. Shunday qilib, Rossiya dronlari bilan bog‘liq voqea Polshani yanada hushyorlikka chaqirdi va mamlakat xavfsizlik siyosati yuzasidan yangi savollarni kun tartibiga olib chiqdi.
