Ayollar past bo‘yli erkaklarni kamroq tanlaydi
Britaniyalik munosabatlar bo‘yicha mutaxassis Treysi Koks Daily Mail nashriga bergan intervyusida ayollar nega 160 santimetrdan past bo‘lgan erkaklar bilan uchrashishdan bosh tortishini tahlil qildi. Bu haqda Zamin.uz xabar berdi.
Unga ko‘ra, bu qaror ko‘pincha ochiqchasiga aytilmaydi, ammo ayollar o‘z tanlovini bo‘yi baland erkak yonida ayollikni his qilish yoki xavfsizlik hissi bilan izohlaydi. Ba’zi ayollar esa shunchaki o‘pish, quchoqlash yoki do‘stlarining munosabati sababli bunday erkaklarni tanlamasliklarini tan olishadi.
Hatto ayrimlari ochiqchasiga: “Men past bo‘yli yigit bilan uchrashishdan ko‘ra, bir umr yolg‘iz qolishni afzal bilaman”, deb bildiradi. Bunday qarorlar past bo‘yli erkaklar uchun qiyin bo‘lib, ular rad etilish, o‘zini qobiliyatsiz his qilish va depressiyaga tushish xavfi bilan yuzlashadi.
Tadqiqotlar shuni ko‘rsatadiki, bo‘yi 180 santimetrdan yuqori erkaklar tanishuv ilovalarida 40 foiz ko‘proq javob oladi, ko‘proq daromad qiladi va rahbarlik lavozimlarida ko‘proq e’tirof etiladi. Shunga qaramay, ba’zi ayollar eski stereotiplardan voz kechib, o‘zini erkin his qiladigan past bo‘yli erkaklar bilan mustahkam va samimiy munosabatlar o‘rnatmoqda.
“Agar mening bo‘yim uni bezovta qilmasa, men ham bezovta qilmayman”, deydi shunday ayollardan biri. Bu holat jamiyatdagi qadriyatlar o‘zgarayotganini ko‘rsatadi.
