Qohiradagi Misr milliy muzeyida nodir va qadimiy eksponat yo‘qolishi haqida jiddiy voqea yuz berdi. Bu haqda Zamin.uz xabar berdi.
Fir’avn Amenemopetga tegishli bo‘lgan tilla bilaguzuk izsiz yo‘qolganligi ma’lum qilindi. Bu voqea Misr qadimiy yodgorliklar vazirligi manbalariga tayangan holda mahalliy va xalqaro ommaviy axborot vositalarida keng yoritildi.
Fir’avn Amenemopet miloddan avvalgi 993-978 yillarda hukmronlik qilgan va o‘z davrida Misrning mashhur hukmdorlaridan biri hisoblangan. Yo‘qolgan bilaguzuk sof oltindan yasalgan, ustida lazurit toshlari bilan bezaklar bor edi.
Muzey ma’lumotlariga ko‘ra, uning og‘irligi taxminan 600 grammni tashkil qiladi. Ushbu artefakt uch ming yildan ortiq tarixga ega bo‘lib, misrshunos olimlar uchun katta ahamiyat kasb etardi.
Bilaguzukning yo‘qolishi muzeydagi inventarizatsiya jarayonida aniqlangan, biroq uni oxirgi marta qachon va kim ko‘rganligi hozircha noma’lum. Mahalliy matbuot bu holatni madaniy merosga qaratilgan eng katta zarba sifatida baholamoqda.
Hozirda muzeyda ichki tekshiruv ishlari olib borilmoqda va maxsus komissiya tashkil etilgan. Aybdorlar hali aniqlanmagan bo‘lsa-da, vazirlik barcha aeroportlar, dengiz portlari va chegara postlariga rasmiy ogohlantirish yuborgan.
Yo‘qolgan bilaguzukning fotosuratlari rasmiy organlarga tarqatilgan va uning mamlakatdan noqonuniy olib chiqilishining oldini olish uchun chora-tadbirlar ko‘rilmoqda. Qohiradagi milliy muzey dunyodagi eng yirik madaniy xazinalardan biri sanaladi.
Muzeyda 17 mingdan ortiq eksponat saqlanadi. Shulardan biri fir’avn Amenemopetning mashhur dafn niqobi bo‘lib, u ham muzeyning eng noyob asarlari qatoriga kiradi.
Hozirda mutasaddilar restavratsiya bo‘limida boshqa buyumlar yo‘qolmaganligini aniqlash maqsadida to‘liq inventarizatsiya ishlarini davom ettirmoqda. Ushbu voqea madaniy merosni himoya qilish zaruratini yana bir bor ta’kidlaydi.
