AQSHning Colossal Biosciences nomli biotexnologiya kompaniyasi XVII asrda butunlay yo‘q bo‘lgan dodo qushini qayta tiriltirish loyihasini boshladi. Bu haqda Zamin.uz xabar berdi.
Bloomberg nashrining xabariga ko‘ra, kompaniya bu maqsadga yetish uchun yetti yil muddat belgilagan. Tadqiqotchilar dodoning eng yaqin qarindoshlaridan biri bo‘lgan kaptardan olingan birlamchi jinsiy hujayralarni laboratoriya sharoitida yetishtirishga muvaffaq bo‘lishdi.
Bu jarayon dodoning genetik tuzilishini qayta yaratishga imkon beradi. Colossal Biosciences loyihani amalga oshirish uchun 120 million dollardan ortiq mablag‘ sarflagan va kompaniyaning umumiy moliyalashtirish hajmi 555 million dollarga yetgan.
Startapning bozor qiymati 10,3 milliard dollardan oshadi. Yaqin yillarda Texas shtatida maxsus qushlarni o‘rganish va genetik tadqiqot markazi qurilishi rejalashtirilmoqda.
Shuningdek, kompaniya ilgari “qo‘rqinchli bo‘ri”ni qayta tiriltirish bo‘yicha ham ish olib borgan. Olimlar toshga aylangan qoldiqlardan olingan namunalar bilan zamonaviy kulrang bo‘rilarning genlarini uyg‘unlashtirib, kattaroq yangi tur yaratdilar.
Ushbu hayvonlar hozirgi bo‘rilardan 20–25 foizga kattaroqdir. Biroq bu loyiha mutaxassislar o‘rtasida bahs-munozaralarga sabab bo‘ldi, chunki ayrim olimlar yangi tur haqiqiy qo‘rqinchli bo‘ri emas, balki uning uzoq qarindoshiga yaqin genetik kombinatsiya ekanligini ta’kidlashmoqda.
