Tailandda erkak qasddan uzuk o‘g‘irladi va hibsga tushdi
Tailandning Udon Thani viloyatida yashovchi 30 yoshli Pakin ismli erkak ataylab qimmatbaho uzuk o‘g‘irlab, o‘zini hibsga olishni xohladi. Bu haqda Zamin.uz xabar berdi.
U zargarlik do‘koniga kirib, sotuvchilardan “Agar men shu uzuk bilan chiqib ketsam, meni hibsga olishadimi?” deb so‘radi. Javobni eshitgach, uzukni olib, qo‘rqmay do‘kondan chiqib ketdi.
Do‘kon xodimlari uni darhol ushlab, politsiyaga topshirdi. Pakin hech qanday qarshilik ko‘rsatmay, qasddan jinoyat qilganini tan oldi.
So‘roq vaqtida u avval ham qamoqda bo‘lganini, ozodlikdagi hayot unga qiyinligini, qamoqdagi qat’iy tartibni afzal ko‘rishini aytdi. Oilaviy muammolar va narkotikga qaramlik sabab jamiyatdan uzilib qolganini bildirgan.
Shuning uchun u hech ikkilanmay qamoqqa qaytish uchun jinoyat yo‘lini tanlagan. Do‘kon egasi unga qarshi da’vo ariza bermagani uchun o‘g‘rilik bo‘yicha jazo tayinlanmadi, ammo politsiya uning narkotik moddalarga bog‘liqligini inobatga olib, ayblov qo‘yib, reabilitatsiya markaziga yubordi.
Mutaxassislar bunday holatlar insonning ruhiy muammolari va ijtimoiy moslashuvdagi qiyinchiliklardan dalolat berishini ta’kidlashmoqda. Jamiyatdagi yordam va psixologik qo‘llab-quvvatlash tizimi kuchli bo‘lmasa, insonlar hatto qamoqni erkinlikdan ustun qo‘yishi mumkin.
