Olmaota Markaziy Osiyoda yashash uchun eng qimmat shahar
Markaziy Osiyo shaharlarining yashash uchun eng qimmat hududlari ro‘yxati e’lon qilindi. Bu haqda Zamin.uz xabar berdi.
“Numbeo” portali tomonidan joriy yilning birinchi yarmi yakunlariga ko‘ra tayyorlangan reytingda Qozog‘istonning Olmaota shahri mintaqadagi eng qimmat shahar sifatida tan olindi. Hisobotda Olmaota shahri yashash qiymati indeksi bo‘yicha 29,4 punkt bilan jahon miqyosida 346-o‘rinni egalladi.
Bu natija uni nafaqat Qozog‘istonda, balki butun Markaziy Osiyoda yetakchi shahar darajasiga olib chiqdi. Reytingda boshqa shaharlarning o‘rinlari ham ko‘rsatilgan.
Qirg‘iziston poytaxti Bishkek 26,8 indeks bilan 364-o‘rinda joylashgan. Qozog‘istonning yana bir yirik shahri Astona 26,5 indeks bilan 366-o‘rinni egalladi.
O‘zbekiston poytaxti Toshkent esa 26,2 indeks bilan 370-o‘rinda qayd etildi. Tojikiston va Turkmaniston shaharlarining ma’lumotlari ushbu hisobotga kiritilmagan.
Toshkentda yashash xarajatlari haqida ma’lumotlarga ko‘ra, to‘rt kishilik oilaning uy-joy ijarasi hisobga olinmagan holda o‘rtacha oylik xarajatlari taxminan 23 million 39 ming so‘mni tashkil etadi. Yolg‘iz yashovchi shaxs uchun bu ko‘rsatkich 6 million 437 ming so‘m atrofida bo‘ladi.
Shuningdek, Toshkentda yashash qiymati Nyu-York shahri bilan solishtirilganda 72,2 foiz arzonroqdir. Uy-joy ijarasi bo‘yicha esa farq yanada katta bo‘lib, Toshkentda ijara narxlari Nyu-Yorkdagidan o‘rtacha 84,5 foiz arzon ekanligi qayd etilgan.
