Tolibon hukumati Afg‘onistondagi universitetlarda ayollar tomonidan yozilgan kitoblarni o‘qitishni taqiqladi. Bu haqda Zamin.uz xabar berdi.
Shuningdek, inson huquqlari va jinsiy zo‘ravonlikka oid fanlar ham ta’lim dasturidan chiqarildi. Rasmiy ma’lumotlarga ko‘ra, taqiqlangan 680 kitob orasida 140 tasi ayollar muallifligiga tegishlidir.
Ushbu qarorga ko‘ra, universitetlarda jami 18 ta fan o‘qitilmaydi. Ularning oltitasi aynan ayollar mavzusiga bag‘ishlangan bo‘lib, “Gender va rivojlanish” hamda “Ayollar sotsiologiyasi” kabi fanlar ham taqiqlangan.
Bundan tashqari, Eronlik mualliflar yoki Eron nashriyotlari tomonidan chop etilgan kitoblar ham universitetlarda ta’qiqlangan. Mutaxassislar bu qarorning oliy ta’lim sifatiga salbiy ta’sir ko‘rsatishini ta’kidlamoqda.
Tolibonning ushbu qarori so‘nggi yillarda ayollarning ta’lim olishiga qo‘yilgan cheklovlarning davomidir. Ayollar maktab va oliy ta’limdan chetlatilganidan so‘ng, endi ularning ilmiy faoliyati ham taqiqlanmoqda.
Bu holat mamlakatda ayollarning ta’lim va ilmiy izlanishlarga bo‘lgan huquqlarining keskin kamayishiga olib kelmoqda. Oliy ta’lim muassasalari uchun bu qaror salbiy oqibatlarga sabab bo‘lishi kutilmoqda.
