Kiyevda 13 o‘zbekistonlik qullikka majburlanganligi aniqlandi

Kiyev viloyatida o‘zbekistonlik 13 nafar fuqaroning noqonuniy ravishda qullikka majburlangani aniqlanib, jamoatchilikda katta shov-shuvga sabab bo‘ldi. Bu haqda Zamin.uz xabar berdi.

Kiyev viloyati prokuraturasi tomonidan berilgan ma’lumotga ko‘ra, bu jinoyatni Xitoyning ikki fuqarosi, bir o‘zbekistonlik va ukrainalik ayol tashkil qilgan. Hozirda ushbu shaxslarning barchasi qo‘lga olingan va sud jarayoni boshlanishi kutilmoqda.

Tergov ma’lumotlariga ko‘ra, qurbonlar asosan qiyin hayot sharoitida, uy-joysiz va moddiy qiyinchilikda bo‘lgan shaxslar orasidan tanlab olingan. Ular Ukrainada munosib ish va sharoitlar bilan ta’minlanish va’da qilingan, biroq amalda butunlay boshqacha vaziyat yuzaga kelgan.

Odamlar joylashtirilgan xonalarda harakat erkinligi cheklangan, doimiy nazorat ostida bo‘lib, ishga majburlangan. Hatto kundalik ehtiyojlarini ham qat’iy belgilangan jadval asosida qondirishga majbur bo‘lgan.

Shuningdek, hojatxonaga borish uchun ruxsat so‘rash talab qilingan va kichik qoidabuzarliklar uchun jazo va jarimalar qo‘llanilgan. Huquq-tartibot organlari jinoyatchilarga tegishli uy va xo‘jalik obyektlariga reyd o‘tkazib, 13 nafar o‘zbekistonlik fuqaroning g‘ayriinsoniy sharoitlarda yashab turgani fosh etilgan.

Shu bilan birga, tegishli hujjatlar, naqd pul va transport vositalari musodara qilingan. Hozirgi vaqtda gumon qilinuvchilarga nisbatan “odam savdosi” va “majburiy mehnatga jalb qilish” kabi og‘ir ayblovlar qo‘yilgan.

To‘rt shaxsning barchasi ushbu jinoyatlar bo‘yicha tergov ostida. Mazkur holat dunyoda majburiy mehnat va odam savdosi muammosining qanchalik jiddiy ekanligini yana bir bor ko‘rsatmoqda.

Jinoyatchilarning jazolanishi qurbonlar uchun kechikkan adolat bo‘lsa-da, ularning erkinlikka chiqishi muhim qadam hisoblanadi.