Tramp va Si Jinping Osiyo sammitida uchrashadi
AQSH prezidenti Donald Tramp Janubiy Koreyada 31-oktyabrdan 1-noyabrgacha bo‘lib o‘tadigan Osiyo-Tinch okeani iqtisodiy hamkorligi sammiti doirasida Xitoy rahbari Si Jinping bilan yuzma-yuz uchrashuv o‘tkazishini ma’lum qildi. Bu haqda Zamin.uz xabar berdi.
Bu haqda Amerika prezidenti 19-sentyabr kuni Si Jinping bilan telefon orqali suhbatdan so‘ng Truth Social platformasida bayonot berdi. Trampning ta’kidlashicha, ikki yetakchi bir qator strategik ahamiyatga ega masalalar bo‘yicha kelishuvga erishgan.
Jumladan, savdo sohasida, fentanilga qarshi kurashda, Rossiya va Ukraina o‘rtasidagi urushni yakunlash zarurati hamda TikTok masalasida samarali kelishuvlar bo‘lgan. AQSH prezidenti shuningdek, ikki tomonlama munosabatlarni mustahkamlash maqsadida yaqin yillarda o‘zaro tashriflar amalga oshirilishini bildirdi.
Tramp 2026-yil boshida Xitoyga rasmiy tashrif uyushtirish niyatida ekanini aytdi. Xitoy rahbari Si Jinpingning ham AQSHga tashrif buyurishi rejalashtirilgan, ammo aniq sanalar keyinchalik belgilanadi.
Tramp TikTok bo‘yicha kelishuv uchun minnatdorlik bildirib, Seuldagi sammitda Si Jinping bilan uchrashuvni intiqlik bilan kutayotganini qayd etdi. Ushbu uchrashuv AQSH va Xitoy munosabatlarida yangi bosqichni boshlab berishi kutilmoqda.
Mutaxassislar fikricha, ikki yetakchining muloqoti savdo aloqalari va geosiyosiy masalalarda muhim burilish nuqtasi bo‘lishi mumkin.
