Germaniyada noqonuniy ishchilarni aniqlash reydi boshlandi
Germaniyada umumiy ovqatlanish sohasida noqonuniy ishchi kuchidan foydalanishga qarshi keng ko‘lamli reyd o‘tkazildi. Bu haqda Zamin.uz xabar berdi.
Federal bojxona tergovchilari 19-sentyabr kuni mamlakatning turli shaharlarida maxsus tekshiruvlar olib bordi. Kyoln bojxona boshqarmasi matbuot kotibi Yens Alandning ma’lumotiga ko‘ra, bu operatsiya butun Germaniya bo‘ylab amalga oshirilmoqda.
Uning asosiy maqsadi noqonuniy ishga joylashish holatlarini aniqlash, eng kam ish haqi qoidalarining buzilishini fosh etish va qonunbuzarliklarga chek qo‘yishdir. Tekshiruvlarda minglab bojxona xodimlari ishtirok etdi.
Reydlar asosan restoranlar va mehmonxonalarga qaratildi. Ilk tekshiruvlar Kyoln shahrida o‘tkazilib, uchta muassasada qonunbuzarliklar aniqlangan.
Yens Alandning so‘zlariga ko‘ra, bunday holatlar deyarli har kuni uchrab turadi. Ko‘plab korxonalar ishchilarini noqonuniy ravishda ishga olib, ularga belgilangan eng kam ish haqidan kam maosh to‘laydi.
Bu haqda ko‘plab shikoyatlar kelib tushmoqda. Reydlar nafaqat yangi tekshiruvlarni, balki oldin aniqlangan muammolarni ham o‘rganishni o‘z ichiga oldi.
Shu kuni deportatsiya qilinishi lozim bo‘lgan bir shaxs topilib, immigratsiya xizmatiga topshirildi. Hozircha reydning yakuniy natijalari e’lon qilinmadi.
Mutaxassislar tekshiruvlar davomida ko‘plab qonunbuzarliklar aniqlanishi va noqonuniy mehnatga nisbatan qat’iy choralar ko‘rilishini kutmoqda.
