Misr Sinayda harbiy kuchini oshirmoqda, Isroil xavotirda

Yaqin Sharqdagi vaziyat murakkablashmoqda. Bu haqda Zamin.uz xabar berdi.

Isroil bosh vaziri Binyamin Netanyahuning ma’lum qilishicha, Misr Sinay yarimorolida harbiy kuchini sezilarli darajada oshirmoqda. Bu esa 1979-yilda imzolangan tinchlik shartnomasiga zid hisoblanadi.

Netanyahuning so‘zlariga ko‘ra, Qohira G‘azo hududiga yaqin joylarda aviabazalarni kengaytirish, yer osti inshootlarini qurish va qo‘shinlarni ko‘paytirishga kirishgan. U bunday harakatlar mintaqadagi muvozanatga salbiy ta’sir ko‘rsatishi mumkinligini bildiradi.

Misr esa bu ayblovlarni rad etib, barcha harakatlar milliy xavfsizlik doirasida amalga oshirilayotganini ta’kidlamoqda. Qohira uchun asosiy xavotir G‘azo aholisi Isroil harbiy amaliyotlari natijasida Sinayga ommaviy qochqin sifatida kirib kelishi ehtimoli hisoblanadi.

Isroil esa aksincha, Misrni qochqinlar uchun yo‘lni to‘sishda va G‘azodan chiqish imkoniyatlarini cheklashda ayblamoqda. Netanyahuning fikricha, Misr harakatlari mintaqadagi vaziyatni yanada murakkablashtiradi va ikki davlat o‘rtasidagi tinchlik kelishuviga shubha tug‘diradi.

Ma’lumotlarga ko‘ra, ikki tomon o‘rtasidagi to‘g‘ridan to‘g‘ri muzokaralar samara bermaganidan so‘ng, Isroil AQShga murojaat qilib, Vashingtondan Misrga bosim o‘tkazishni so‘ragan. Misr esa pozitsiyasida qat’iy turib, hech qanday qoidabuzarlik yo‘qligini ta’kidlamoqda.

Mutaxassislar ogohlantirishicha, agar keskinlik davom etsa, mintaqadagi noyob tinchlik shartnomasi jiddiy xavf ostida qolishi mumkin. Shu bois, tomonlar o‘rtasida tinchlik va barqarorlikni saqlash uchun murosaga kelish muhimdir.