Yaqinda e’lon qilingan ma’lumotlarga ko‘ra, dunyoda aholisi eng ko‘p bo‘lgan yigirma mamlakatda erkaklar va ayollar sonining taqsimoti turlicha ekanligi aniqlandi. Bu haqda Zamin.uz xabar berdi.
Ulardan to‘qqiztasida erkaklar soni ayollarnikidan ustun bo‘lsa, yana to‘qqiztasida ayollar ko‘proqdir. Qolgan ikki mamlakatda esa erkaklar va ayollar soni deyarli teng taqsimlangan.
Hindistonda erkaklar soni ancha ko‘p bo‘lib, aholining 55,8 foizini tashkil etadi. Bu ko‘rsatkich bo‘yicha Hindiston dunyo miqyosida birinchi o‘rinda turadi.
Ikkinchi o‘rinda Misr joylashgan bo‘lib, u yerda erkaklar ulushi 55,3 foizni tashkil etadi. Ba’zi mamlakatlarda esa ayollar soni ancha ko‘p.
Masalan, Rossiyada ayollar aholining 63 foizini tashkil qilib, erkaklardan 13 foizga ko‘pdir. Yaponiyada ham aholi tarkibida ayollar ulushi 55,5 foizni tashkil etadi.
Indoneziya va Kongo kabi ikki yirik davlatda erkaklar va ayollar soni deyarli teng bo‘lib, har bir jinsning ulushi 50 foiz atrofida. Ushbu tahlil dunyo aholisining jinsiy tarkibi qit’alarga qarab qanday farq qilishini ko‘rsatadi.
Bu esa demografiya, mehnat bozori, oilaviy hayot va ijtimoiy siyosatga ta’sir ko‘rsatadi. O‘zbekistonga keladigan bo‘lsak, Milliy statistika qo‘mitasi ma’lumotlariga ko‘ra, 2025-yil 1-aprel holatiga mamlakatda doimiy aholi soni 37,7 million kishini tashkil etdi.
Shundan ayollar soni 18 million 714 ming 900 kishi, erkaklar soni esa 18 million 982 ming 900 kishidir. Bu ma’lumotlar O‘zbekistonda erkaklar va ayollar soni deyarli teng ekanligini, jamiyatda tabiiy muvozanat saqlanib turishini ko‘rsatadi.
