Afg‘onistonda hukmronlik qilayotgan Tolibon harakati vakili Zabihullo Mujohid AQSH prezidenti Donald Trampning Bagrom aviabazasini qaytarish haqidagi talabiga munosabat bildirdi. Bu haqda Zamin.uz xabar berdi.
Unga ko‘ra, Afg‘oniston hech qanday shartda o‘z hududidan voz kechmaydi va mamlakat ichki ishlariga aralashishga yo‘l qo‘ymaydi. Bagrom aviabazasi Amerika harbiylari uchun Afg‘onistondagi eng yirik strategik nuqta hisoblangan va ular bu yerni 2021-yilda tark etgan.
Tolibon vakillari Dohada imzolangan kelishuvga binoan, Qo‘shma Shtatlar Afg‘onistonning hududiy yaxlitligiga tahdid qilmaslik va ichki ishlariga aralashmaslik majburiyatini olganini ta’kidlaydi. Shuning uchun ular o‘z va’dalarini bajarishi lozim.
Zabihullo Mujohid bayonotida Afg‘oniston barcha davlatlar bilan o‘zaro manfaatli va konstruktiv aloqalar o‘rnatishga intilayotganini, AQSH esa o‘tmishdagi xatolarni takrorlamasdan, ratsional va pragmatik siyosat yuritishi zarurligini aytdi. Mavzu yuzasidan mamlakat Mudofaa vazirligi shtabi rahbari Fasihuddin Fitrat ham fikr bildirdi.
U «bazani qaytarish» masalasi siyosiy kelishuv orqali hal qilinmasligini, Afg‘onistonning bir qarich yeri ham savdo obyekti emasligini ta’kidladi. Politico nashri ma’lumotlariga ko‘ra, hozircha AQSH rasmiylari Afg‘oniston bilan Bagrom bazasi haqida ochiq muzokaralar olib borayotgani haqida ma’lumot yo‘q.
Biroq, Trampning keskin bayonotlaridan so‘ng vaziyat yanada dolzarb tus oldi. Avvalroq Tramp o‘zining ijtimoiy tarmog‘ida agar Afg‘oniston Bagrom bazasini qaytarmasa, og‘ir oqibatlar yuz berishini ogohlantirgan.
Shuningdek, u Jo Bayden ma’muriyatini aviabazani Tolibon qo‘liga topshirib, Xitoyga mintaqada ta’sir o‘tkazish imkoniyatini berishda ayblagan. 2021-yilda AQSH qo‘shinlari Afg‘onistondan chiqib ketgach, Tolibon qisqa muddat ichida mamlakatda to‘liq hokimiyatni qo‘lga kiritgan.
Hozirda Bagrom aviabazasi masalasi Vashington va Qobul o‘rtasidagi munosabatlarda yangi tortishuv nuqtasiga aylangan.
