Filippinda keng ko‘lamli norozilik harakatlari kuchayib, yirik to‘qnashuvlarga aylandi. Bu haqda Zamin.uz xabar berdi.
Korrupsiya janjali sababli minglab odamlar ko‘chalarga chiqdi. Ular hukumat idoralari oldida to‘planib, ba’zi binolarni vayron qilishdi.
Ma’lumotlarga ko‘ra, to‘fon va suv toshqinlaridan zarar ko‘rgan aholiga ajratilgan katta mablag‘lar o‘z manziliga yetmagan. Natijada tabiiy ofat oqibatlarini bartaraf etish ishlari umuman amalga oshirilmagan, mablag‘lar esa g‘oyib bo‘lgan.
Bu holat talabalar va keng jamoatchilik orasida kuchli norozilik va g‘azab uyg‘otdi. Namoyishlar davomida to‘qnashuvlar kuchaydi.
Olomon yo‘llarda mashina shinalarini yoqdi, qo‘lga tushgan tosh va shishalar bilan politsiyaga qarshi kurashdi. Hodisalar davomida 40 ga yaqin tartib saqlovchi jarohat oldi, 17 kishi esa hibsga olindi.
The Guardian nashrining xabar qilishicha, davlat budjeti hisobidan 17,6 milliard dollar yo‘qolgani aniqlangan. Bundan tashqari, moliya vaziri oldinroq davlat infratuzilmasi uchun ajratilgan mablag‘larning taxminan 70 foizi korrupsiya tufayli yo‘qotilayotgani haqida ochiq bayonot bergan edi.
Bu holatlar mamlakatda jiddiy ijtimoiy va siyosiy muammolarni yuzaga keltirmoqda.
