Novorossiyskda Ukraina dronlari port va shaharni urdi
2023-yil 24-sentyabr kuni Ukraina dronlari Rossiyaning Krasnodar viloyatidagi Novorossiysk shahri markaziga hujum uyushtirdi. Bu haqda Zamin.uz xabar berdi.
Hudud gubernatori Veniamin Kondratevning ma’lum qilishicha, ushbu hujum natijasida shahar markazidagi bir qator bino va inshootlarga zarar yetdi. Aynan shu vaqtda dengiz dronlari ham Novorossiysk portiga zarba berdi.
Ushbu port Rossiyaning eng yirik dengiz yo‘laklaridan biri bo‘lib, unda xalqaro Kaspiy quvurlari konsorsiumining neft terminali hamda Qora dengiz floti harbiy-dengiz bazasi joylashgan. Hududiy favqulodda shtab xabariga ko‘ra, hujum oqibatida yettita turar-joy binosi zarar ko‘rgan, jumladan, «Novorossiysk» mehmonxonasi va Shevchenko ko‘chasidagi ko‘p qavatli uyning tom qismi yonib ketgan.
Hodisa sabab ikki kishi halok bo‘lib, yana yettita shaxs turli darajada jarohat olgan. Jabrlanganlar orasida voyaga yetmagan bola ham bor, ularning uch nafari og‘ir ahvolda shifoxonaga yotqizilgan.
Shuningdek, 20 dan ortiq avtomobillarga zarar yetgan, uchtasi to‘liq yonib ketgan. Shaharda favqulodda holat e’lon qilinib, gubernator aholini xavfsizlik qoidalariga qat’iy rioya qilish va imkon qadar uyda qolishga chaqirdi.
Kaspiy quvurlari konsorsiumi hujum sabab ofis faoliyatini vaqtincha to‘xtatganini ma’lum qildi. Bino zarar ko‘rgani uchun barcha xodimlar evakuatsiya qilingan.
Konsorsium ma’lumotlariga ko‘ra, ikki ishchi jarohat olgan, shuningdek, kompaniya xodimlariga aloqasi yo‘q shaxslar orasida ham og‘ir jarohatlanganlar mavjud. Rossiyaning dengiz va daryo transporti federal agentligi (Rosmorrechflot)ning xabar berishicha, hujumdan keyin port infratuzilmalari va kemalarga katta zarar yetmagan.
Hodisa yuzasidan Krasnodar hududida xavfsizlik choralari kuchaytirildi. Gelenjik shahrida barcha suzish vositalarining dengizga chiqishi vaqtincha taqiqlangan.
Tuapse va Sochi shaharlarida esa qirg‘oqbo‘yi aholisi vaqtinchalik evakuatsiya qilinmoqda. Rossiya Mudofaa vazirligi va Ukraina harbiylari hozirgacha ushbu hodisa yuzasidan rasmiy bayonot bermagan.
Vaziyat yuzasidan qo‘shimcha ma’lumotlar kelib tushmoqda.
