Xitoy internetda salbiy kontentga qarshi kampaniya boshladi
Xitoy kibermakon ma’muriyati internetda salbiy kayfiyat tarqatuvchi kontentga qarshi ikki oylik keng qamrovli kampaniya boshlashini ma’lum qildi. Bu haqda Zamin.uz xabar berdi.
Ushbu kampaniya doirasida rasmiylar internet trollari va provokatorlarga qarshi qattiq chora ko‘rishni rejalashtirmoqda. Asosiy e’tibor ijtimoiy tarmoqlar, qisqa video platformalari va strim-translyatsiya xizmatlarida tarqalayotgan salbiy mazmundagi materiallarga qaratiladi.
Kampaniya doirasida hayotga salbiy munosabat uyg‘otadigan, yashashdan charchash kabi kayfiyatlarni kuchaytiruvchi kontentlarga qarshi chora ko‘riladi. Shuningdek, yoshlar orasida keng tarqalgan va iqtisodiy qiyinchiliklar, ish o‘rinlarining yetishmasligi sababli paydo bo‘lgan «sanga madaniyati»ga qarshi kurash olib boriladi.
Bu madaniyatning tarqalishi nafaqat yoshlar ongiga, balki butun jamiyat kayfiyatiga salbiy ta’sir ko‘rsatishi mumkinligi ta’kidlanmoqda. Ijtimoiy tarmoqlarning algoritmlari ko‘pincha foydalanuvchilarning qiziqishlariga mos kontentni taqdim etib, salbiy fikrlarning kuchayishiga sabab bo‘lmoqda.
Shu sababli yangi kampaniya asosan salbiy fikrlar, asossiz tanqidlar va muhokamalarni qo‘zg‘atayotganlarga qaratiladi. Bundan tashqari, sun’iy intellekt yordamida tarqatilayotgan shafqatsiz va murosasiz materiallar ham taqiqlanadi.
Internet trollari yashirinishga majbur qilinadi, fitna nazariyalari va soxta ma’lumotlarga yo‘l qo‘yilmaydi. Qoidabuzarlarga nisbatan qattiq jazo choralarini qo‘llash rejalashtirilmoqda, biroq davlat tomonidan aniq qanday chora-tadbirlar ko‘rilishi hozircha ma’lum emas.
Yangi siyosat orqali Xitoy rasmiylari internet muhitini tozalash, yoshlar o‘rtasida sog‘lom kayfiyatni shakllantirish va virtual olamda nazoratni kuchaytirishni maqsad qilgan.
