Lavrov va Rubio Nyu-Yorkda Ukraina bo‘yicha uchrashdi
Rossiya Tashqi ishlar vaziri Sergey Lavrov va AQSh Davlat kotibi Marko Rubio 24-sentyabr kuni Nyu-York shahrida BMT Bosh Assambleyasining 80-sessiyasi doirasida uchrashuv o‘tkazdi. Bu haqda Zamin.uz xabar berdi.
Uchrashuv qisqa, bir soatdan kam davom etgan bo‘lsa-da, xalqaro jamoatchilik e’tiborini tortdi. AQSh Davlat departamenti ma’lumotlariga ko‘ra, Rubio prezident Donald Trampning qotilliklarni to‘xtatish va Moskva Rossiya-Ukraina urushiga barqaror yechim topish uchun zarur choralar ko‘rishi kerakligi haqidagi chaqiriqlarini takrorlagan.
Unga ko‘ra, Vashington mojaroni faqat diplomatik yo‘l bilan hal qilishni ustuvor vazifa deb biladi. Rossiya Tashqi ishlar vazirligi bayonotida ikki tomon Ukrainadagi vaziyatni bartaraf etish borasida fikr almashgani ma’lum qilindi.
Lavrov Moskva AQSh bilan inqirozning ildiz omillarini bartaraf etish uchun qo‘shma harakatlarni muvofiqlashtirishga tayyorligini ta’kidladi. Shu bilan birga, u mavjud mojaroni cho‘zishga xizmat qiladigan sun’iy sxemalar Rossiya uchun qabul qilinmasligini qo‘shimcha qildi.
Shuni eslatib o‘tish joizki, Sergey Lavrov va Marko Rubio 10-iyul kuni Malayziya poytaxti Kuala-Lumpurda ham uchrashgan edi. O‘sha paytdagi muhokamalar ham asosan Ukraina bo‘yicha global kelishuvlarga bag‘ishlangan edi.
Nyu-Yorkdagi so‘nggi muzokaralar ikki davlat o‘rtasida Ukraina masalasi bo‘yicha yondashuvlar keskin farq qilayotganini ko‘rsatdi. Shu bilan birga, diplomatik dialog urushni to‘xtatish yo‘lida muhim vosita bo‘lib qolmoqda.
