Xitoylik olimlar Oy yuzasidagi tuproqdan qurilish g‘ishtlarini ishlab chiqarishga mo‘ljallangan dunyodagi birinchi qurilma prototipini yaratdilar. Bu haqda Zamin.uz xabar berdi.
Ushbu yangi dastgoh Xefey shahrida o‘tkazilgan Butunjahon ishlab chiqarish sanoati konferensiyasida taqdim etildi, deb xabar berdi Sinxua agentligi. Qurilma quyosh energiyasi yordamida ishlaydi va nurlarni uch ming barobarga kuchaytirib fokuslaydi.
Shu orqali Oy yuzasidagi regolit eritilib, mustahkam va sifatli g‘ishtlarga aylantiriladi. Mutaxassislarning fikricha, Oyda qurilish materiallarini to‘g‘ridan-to‘g‘ri tayyorlash stansiyalar hamda infratuzilmani barpo etishda muhim ahamiyatga ega bo‘ladi.
Ushbu loyiha doirasida 2035-yilgacha baza majmuasi bunyod etilishi, 2040-yillarda esa uning kengaytirilishi rejalashtirilgan. Bu yutuq insoniyatning kosmosda mustahkam infratuzilma yaratish yo‘lidagi muhim qadamlardan biri hisoblanadi.
O‘z navbatida, qurilish jarayonlarini soddalashtirish va xarajatlarni kamaytirish imkonini beradi. Shu tariqa, Oyda inson faoliyati uchun qulay sharoitlar yaratish va uzoq muddatli missiyalarni amalga oshirish imkoniyati oshadi.
