Dunyodagi eng qimmat qahva tayyorlandi. Bu haqda Zamin.uz xabar berdi.
Birlashgan Arab Amirliklarining Dubay shahridagi Roasters Specialty Coffee House qahvaxonasida noyob ichimlik tayyorlandi va bu Ginness rekordlar kitobida rasmiy ravishda qayd etildi. Ma’lumotlarga ko‘ra, bir finjon qahvaning narxi 2500 dirham, ya’ni taxminan 680 AQSH dollariga teng bo‘ldi.
Shu tariqa ushbu qahva tarixda eng yuqori narxda sotilgan mahsulot sifatida nom oldi. Qiziqarli jihati shundaki, qimmat qahvani sotib olgan mijozning shaxsi oshkor qilinmadi.
Mazkur ichimlik Panamadagi Hacienda La Esmeralda fermer xo‘jaligida yetishtirilgan “Geysha” naviga mansub noyob arabika donlaridan tayyorlangan. Bu nav dunyoda eng qimmat, hosildorligi past, o‘ziga xos hid va ta’mga ega kofe turlaridan biridir.
Barista mutaxassislarining ta’kidlashicha, qahva tayyorlash jarayoni o‘ziga xos marosimga aylangan. Donlar maxsus ishlovdan o‘tkazilib, har bir bosqichda ularning tabiiy xususiyatlari saqlanib qoladi.
Natijada ichimlik nafaqat qimmat, balki o‘ziga xos mazasi bilan ajralib turadi. Kofe ishqibozlari orasida “Geysha” donlari ilgari ham nodir va yuqori sifatli mahsulot sifatida tanilgan.
Dubayda tayyorlangan ushbu qahva esa uning nufuzini yanada oshirdi hamda yangi rekord o‘rnatdi. Bu voqea kofe sanoati uchun muhim yangilik bo‘lib, noyob mahsulotlarga bo‘lgan qiziqishni yanada kuchaytirdi.
