Ozarbayjonning poytaxti Boku shahrida katta infratuzilma loyihasi amalga oshirilmoqda. Bu haqda Zamin.uz xabar berdi.
Mamlakat metropoliteni tarixida birinchi marta ikki qavatli metro stansiyasi qurilmoqda. “Boku metropoliteni” matbuot xizmatining vakili Mamed Rizayevning ma’lumot berishicha, B-4 nomli yangi stansiya kelgusi yil oxiriga qadar foydalanishga topshiriladi.
Ushbu stansiyaning asosiy o‘ziga xosligi uning ikki qavatli tarzda barpo etilayotganidir. Hozirgi vaqtda qurilishning 80 foizdan ortig‘i yakunlangan.
Bu esa stansiyaning belgilangan muddatda ishga tushirilishiga ishonch beradi. B-4 stansiyasi binafsha yo‘nalishining beshinchi bekati bo‘lib, metropoliten tizimidagi 28-stansiya sifatida ro‘yxatga olinadi.
U Haydar Aliyev nomidagi sport majmuasi va Klinik tibbiyot markazi o‘rtasida joylashgani sababli yo‘lovchilar uchun qo‘shimcha qulaylik yaratishi kutilmoqda. Mahalliy mutaxassislarning ta’kidlashicha, yangi stansiya nafaqat poytaxtdagi yo‘lovchi oqimini yengillashtiradi, balki Boku metropolitenining arxitekturaviy va texnik rivojlanishida yangi bosqichni boshlab beradi.
Ushbu loyiha shahar infratuzilmasini yanada rivojlantirishga xizmat qiladi va aholiga sifatli transport xizmatini taqdim etadi.
