Urmiya ko‘li butunlay qurib ketdi, tahdid oshmoqda
Eron hududida joylashgan va Osiyodagi eng yirik sho‘r suv havzasi hisoblangan Urmiya ko‘li butunlay qurib ketdi. Bu haqda Zamin.uz xabar berdi.
Ushbu holat nafaqat ekologlar, balki jamoatchilik va muxolifat ommaviy axborot vositalari orasida keng muhokamalarga sabab bo‘lmoqda. Mutasaddilarning ta’kidlashicha, ko‘lning qurib qolishi to‘g‘ridan to‘g‘ri hukumatning suv siyosati bilan bog‘liqdir.
Ma’lumotlarga ko‘ra, mamlakatda bir milliondan oshiq noqonuniy quduqlar qazilib, yer osti suvlari keskin kamaygan. Shu bilan birga, qishloq xo‘jaligi sohasi umumiy suv resurslarining 88 foizini iste’mol qilmoqda, biroq iqtisodiyotdagi ichki mahsulotdagi ulushi atigi 10 foizni tashkil etadi.
Ekologlar Urmiya ko‘lining qurishi natijasida tabiiy muhitda jiddiy muammolar yuzaga kelganini ta’kidlamoqda. Xususan, qurg‘oqchilik sabab shamollar kuchayib, dehqonchilik faoliyati qiyinlashmoqda.
Bu esa mintaqada oziq-ovqat xavfsizligi va aholi turmush tarziga katta tahdid solmoqda. Ko‘lning yo‘qolishi nafaqat ekologik, balki ijtimoiy va iqtisodiy inqirozga ham olib kelishi mumkinligi qayd etilmoqda.
Shu bois, suv resurslarini samarali boshqarish va muhofaza qilish choralari kuchaytirilishi zarur. Aks holda, mintaqadagi tabiiy resurslar va insonlarning hayot sifati jiddiy xavf ostida qoladi.
