Janubiy Koreyada erkak politsiyaga 60 ming marta qo‘ng‘iroq qilgan
Janubiy Koreyada yashovchi 50 yoshli erkak ikki yil davomida politsiyaga deyarli 60 ming marta qo‘ng‘iroq qilgani ma’lum bo‘ldi. Bu haqda Zamin.uz xabar berdi.
The Korea Herald nashrining xabariga ko‘ra, ushbu shaxs 2022 yildan 2024 yilgacha jami 58 307 marta politsiyaga telefon qilgan. Bu kuniga o‘rtacha 80 marta qo‘ng‘iroq qilishga teng.
Eng yuqori faollik 2024 yil may oyida kuzatilgan bo‘lib, to‘rt kun ichida u huquq-tartibot organlariga qariyb 2000 marta murojaat qilgan. Ma’lumotlarga ko‘ra, erkak avvalroq telefon orqali bezovta qilgani uchun ma’muriy jazoga tortilgan.
Yangi qonun loyihasi esa unga yoqmagani sababli u politsiyaga qayta-qayta murojaat qilishni davom ettirgan. Qo‘ng‘iroqlar davomida u turli yolg‘on ma’lumotlar bergan, jumladan, ukasini o‘ldirish bilan tahdid qilgani va o‘tgan o‘n yil davomida asirlikda saqlanganini aytgan.
Tekshiruv natijasida uning 50 dan ortiq qo‘ng‘irog‘i og‘ir jinoyatlar qatoriga kirishi aniqlangan. Hozirda erkak xizmat burchlariga to‘sqinlik qilgani uchun tergov qilinmoqda.
U politsiyaga ko‘p marta qo‘ng‘iroq qilishini o‘zining yolg‘izligini yengish usuli sifatida izohlagan. Ko‘pincha uyda yolg‘iz ichib olib, keyin politsiyaga telefon qilish odatiga aylangan.
Ushbu holat yuzasidan erkak besh yilgacha qamoq jazosiga yoki 10 million von miqdorida jarimaga tortilishi mumkinligi aytilmoqda. Politsiya va sud organlari mazkur holatni chuqur o‘rganmoqda.
