Yurak kasalliklari dunyoda o‘limning yetakchisi
Dunyo bo‘yicha o‘lim sabablari orasida yurak-qon tomir kasalliklari eng ko‘p uchraydigan kasalliklar qatorida birinchi o‘rinda turibdi. Bu haqda Zamin.uz xabar berdi.
1990 yildan 2023 yilgacha bo‘lgan 204 mamlakat ma’lumotlari asosida tayyorlangan yangi xalqaro hisobotda shunday xulosaga kelindi. Hisobot natijalariga ko‘ra, yurak va qon tomir kasalliklari har uchinchi o‘lim holatiga sabab bo‘lmoqda.
1990 yilda ushbu kasalliklardan 13,1 million kishi vafot etgan bo‘lsa, 2023 yilda bu raqam 19,2 millionga yetdi. Shuningdek, ko‘plab hududlarda erkaklarda o‘lim darajasi ayollarnikidan yuqori ekanligi qayd etilgan.
Yurak-qon tomir kasalliklari erta o‘lim yoki nogironlik bilan bog‘liq sog‘lom hayot yillarining yo‘qotilishida ham asosiy omil hisoblanadi. Bu holat kasalliklarning jiddiyligini yanada oshiradi.
Mutaxassislar ta’kidicha, yurak-qon tomir kasalliklariga olib keluvchi xavf omillarining 80 foizigacha oldini olish mumkin. Ushbu omillar orasida semizlik, yuqori qon bosimi, qand miqdorining oshishi va xolesterin darajasining yuqoriligi muhim o‘rin tutadi.
Shu sababli, sog‘lom ovqatlanish, muntazam jismoniy faollik, sog‘lom turmush tarzini shakllantirish hamda shifokor nazoratidan doimiy o‘tib turish yurak-qon tomir kasalliklarining oldini olishda katta ahamiyatga ega. Bu choralar inson salomatligini yaxshilash va umr davomiyligini oshirishga xizmat qiladi.
