Venera orbitasida xavfli asteroidlar guruhi aniqlandi

San-Paulu universiteti astronomlari Venera sayyorasi orbitasi atrofida harakatlanadigan va zamonaviy teleskoplarda deyarli ko‘rinmaydigan asteroidlar guruhini aniqladi. Bu haqda Zamin.uz xabar berdi.

Astronomy & Astrophysics jurnalida e’lon qilingan ma’lumotlarga ko‘ra, ushbu asteroidlar “Venera ko-orbital asteroidlari” deb nomlanadi. Ular sayyora atrofida noaniq trayektoriya bo‘yicha harakat qilib, har 12 ming yilda Yer uchun xavfli holatga o‘tishi mumkin.

Olimlarning fikricha, Quyoshga yaqin orbitada joylashgan bunday obyektlar eng katta xavfni tug‘diradi, chunki ularni teleskoplar yordamida kuzatish juda qiyin. Tadqiqot muallifi Valerio Karruba asteroid diametri 300 metr bo‘lib, u 4,5 kilometrgacha krater hosil qilishi va yuzlab megatonna energiya chiqarishi mumkinligini ta’kidladi.

Agar bunday obyekt aholi yashaydigan hududga tushsa, oqibatlari juda jiddiy bo‘ladi. Shuningdek, hatto eng zamonaviy rasadxonalar ham bunday asteroidlarni yil davomida faqat bir-ikki hafta kuzata oladi.

Shu sababli olimlar Quyosh atrofidagi fazoni yaxshiroq kuzatish uchun maxsus kosmik teleskoplarni ishga tushirishni taklif qilmoqda. Bu tadqiqotlar sayyoramiz xavfsizligini ta’minlashda muhim ahamiyatga ega hisoblanadi.