Hindiston AQSHdan neft importini oshirishni so‘radi
Bloomberg agentligining ma’lumotlariga ko‘ra, Hindiston hukumati rasmiylari AQSHdan Rossiyadan neft importini kamaytirish evaziga sanksiyalar ostidagi Eron va Venesueladan neft sotib olishga ruxsat berishni so‘ragan. Bu haqda Zamin.uz xabar berdi.
Bu haqda Hindiston delegatsiyasi AQSHga amalga oshirgan rasmiy tashrif chog‘ida ham takrorlangan. Hindiston vakillari ta’kidlaganidek, Rossiya, Eron va Venesuela kabi yirik neft yetkazib beruvchilarining bir vaqtning o‘zida ta’minotdan chiqishi jahon bozorida neft narxining keskin oshishiga olib kelishi mumkin.
Shu sababli mamlakat ushbu muammolarni oldini olish maqsadida AQSHdan neft xaridlarini ko‘paytirishni istamoqda. Muzokaralar AQSHning Rossiyaga nisbatan neft savdosi uchun Hindistonga qo‘llagan qat’iy tariflari joriy etilgandan keyin o‘tkazildi.
Shunga qaramay, Hindiston Rossiyadan neft importini kamaytirgan bo‘lsa-da, uni to‘xtatmagan. Hindistonning neftga bo‘lgan ehtiyoji asosan import hisobidan qoplanadi va Rossiyaning arzon nefti mamlakat uchun muhim ahamiyatga ega.
Misol uchun, iyul oyida Hindiston neftni qayta ishlash zavodlari Rossiya neft barrelini o‘rtacha 68,90 dollardan, Saudiya Arabistoni neft barrelini 77,50 dollardan, AQSH neft barrelini esa 74,20 dollardan xarid qilgan. Hozirgi kunda Hindiston Rossiya neftini tanker orqali eng yirik miqdorda sotib oluvchi mamlakat hisoblanadi.
Shuningdek, Nyu-Yorkda bo‘lgan Hindiston savdo vaziri Piyush Goyyal AQSHdan neft va gaz xaridlarini oshirish niyatini ochiq bildirdi. Uning so‘zlariga ko‘ra, Hindiston energiya xavfsizligi strategiyasida AQSHning ulushi katta ahamiyatga ega.
Bu mamlakatning energetika sohasida barqarorlikni ta’minlash va bozor sharoitlariga moslashish siyosatidan dalolat beradi.
