Tramp Vashingtonda o‘lim jazosini tikladi
AQSH prezidenti Donald Tramp Vashington shahrida o‘lim jazosini qayta tiklash to‘g‘risidagi farmonni imzoladi. Bu haqda Zamin.uz xabar berdi.
Ushbu chora 1981 yilda shahar kengashi tomonidan bekor qilingan edi. Oq uy bayonotiga ko‘ra, Tramp AQSH Bosh prokurori va Kolumbiya okrugi prokuroriga eng og‘ir jinoyatlarni oldini olish va jazolash maqsadida federal o‘lim jazosi qonunlarini to‘liq amalga oshirishni ko‘rsatadigan prezident memorandumini imzoladi.
Endilikda qotillikda ayblangan jinoyatchilar qatl qilinishi mumkin bo‘ladi. O‘lim jazosini tiklashning asosiy sababi shaharda jinoyatchilik darajasining yuqoriligi hisoblanadi.
Tramp bir necha bor AQSH poytaxtida xavf darajasining pasaymasligidan norozilik bildirgan. Oq uy ta’kidicha, Kolumbiya okrugida so‘nggi yillarda yuritilgan yumshoq siyosat jinoyatchilikning oshishiga sabab bo‘lgan va bu aholi, tashrif buyuruvchilar hamda federal idoralar uchun xavf tug‘dirdi.
Shuning uchun Vashington mamlakatdagi eng xavfli shaharlardan biriga aylangan. AQSH Bosh prokurori Pam Bondi o‘lim jazosini mamlakat bo‘ylab kengaytirish harakatini allaqachon e’lon qilgan.
Uning so‘zlariga ko‘ra, bu chora nafaqat Vashingtonda, balki butun AQSH bo‘ylab amalga oshiriladi. Bu qaror jinoyatchilik darajasini kamaytirish va jamiyat xavfsizligini ta’minlash maqsadida qabul qilingan.
