Xitoyda dunyodagi eng baland osma ko‘prik qurilishi yakunlanib, uning rasmiy ochilishiga tayyorgarlik ko‘rilmoqda. Bu haqda Zamin.uz xabar berdi.
Ushbu ko‘prik janubi-g‘arbiy Xitoydagi Guychjou vodiysida, Lyuchji va Anlong shaharlarini bog‘lovchi yo‘l ustida barpo etilgan. Ko‘prik Xuatszyan Grand Kanoni ustidan o‘tib, dengiz sathidan 625 metr balandlikda joylashgani sababli dunyoda eng baland osma ko‘prik maqomiga ega bo‘ldi.
Ko‘prikning umumiy uzunligi 2,9 kilometrni tashkil etadi, asosiy ustunlar orasidagi masofa esa 1,4 kilometrga teng. Yuk ko‘taruvchi konstruksiyalari po‘latdan ishlangan bo‘lib, uning og‘irligi taxminan 22 ming tonnani tashkil etadi.
Bu esa ikki ta Eyfel minorasining og‘irligiga tengdir. Qurilish ishlari 2022-yil boshida boshlangan va ko‘prik nafaqat transport uchun muhim yo‘l, balki sayyohlar uchun ham noyob manzara taklif etadi.
Mutaxassislar ta’kidlaganidek, yangi ko‘prik foydalanishga topshirilgach, haydovchilar uchun katta qulaylik yaratadi. Avval ikki soat davom etgan yo‘l endi atigi ikki daqiqaga qisqaradi.
Ko‘prikning rasmiy ochilishi 28-sentyabr kuni rejalashtirilgan. Bu loyiha mintaqadagi transport tizimini sezilarli darajada yaxshilaydi va iqtisodiy hamda turizm sohasida yangi imkoniyatlar yaratadi.
