Germaniyada kartoshka hosili rekord darajada oshmoqda

Germaniyada qishloq xo‘jaligida so‘nggi 25 yil ichida kartoshka hosilida rekord natija kutilmoqda. Bu haqda Zamin.uz xabar berdi.

Mamlakat qishloq xo‘jaligi vazirligi va Agrarheute nashrining ma’lumotlariga ko‘ra, 2025-yilda kartoshka hosili o‘tgan yillarga nisbatan sezilarli darajada oshishi bashorat qilinmoqda. Rasmiy hisobotlarga ko‘ra, nemis fermerlari bu yil kartoshka hosilini 5,3 foizga ko‘paytirib, jami 13,4 million tonnadan ortiq mahsulot yig‘ib olishni rejalashtirmoqda.

Hosildorlik odatdagidan 17 foiz yuqori bo‘lib, ekin maydonlari ham 6,7 foizga kengaygan. Umuman olganda, kartoshka ekilgan maydon 301 ming gektarga yetdi.

Bir gektardan o‘rtacha 44 tonna hosil olish kutilmoqda, bu so‘nggi yillarda kuzatilmagan ko‘rsatkichdir. Narxlar esa fermerlar uchun kutilgan darajada foydali bo‘lmadi.

Hisob-kitoblarga ko‘ra, 1 sentner kartoshka o‘rtacha 14,9 yevro daromad keltirmoqda, ammo bozorda narxlar 10 yevrodan 24 yevrogacha farq qilmoqda. So‘nggi marta kartoshka narxi shunchalik pastga tushishi 2021-yil kuzida qayd etilgan edi.

Hosilning ko‘pligi esa iste’molchilar uchun ijobiy natija berdi. Iyul oyida kartoshka narxi o‘tgan yilga nisbatan 18,9 foizga arzonlashdi, bu esa aholining kundalik xarajatlariga ijobiy ta’sir ko‘rsatmoqda.

Shu bilan birga, fermerlar hosil ko‘pligi va narxlarning pasayishi sababli kartoshkaning bir qismini chorvachilik uchun yoki biogaz ishlab chiqarish korxonalariga yo‘naltirishga majbur bo‘lmoqda. Mutasaddilar narxlarning yaqin kelajakda ko‘tarilishi kutilmayotganini ma’lum qilishdi.