Pokistonda o‘smir oilasini otib o‘ldirdi, sud hukmi chiqdi

Pokistonda 17 yoshli o‘smir o‘z oilasini otib o‘ldirdi. Bu haqda Zamin.uz xabar berdi.

Lahor shahrida yashagan Zayn Ali ismli o‘smir onasi, akasi va ikki singlisini quroldan otib, ularni halok qildi. Ushbu jinoyat yuzasidan sud uni umrbod qamoq jazosiga hukm qildi.

Hukm 2025 yil 24 sentyabrda Lahor sudida e’lon qilindi. Sudya Riyoz Ahmad Aliga har bir qotillik uchun 25 yildan jami 100 yil qamoq jazosi tayinladi, ammo Alining yoshini inobatga olib, o‘lim jazosi berilmadi.

Sudya ta’kidlashicha, o‘smirning bu jinoyatiga sabablardan biri uning onlayn o‘yin – PUBG ga haddan tashqari berilib ketishi va ruhiy holatining buzilishi bo‘lgan. U o‘yin ta’sirida voqeaga to‘g‘ri baho bera olmagan.

Fojia 2021 yilda sodir bo‘lgan, u paytda Ali 14 yoshda edi. U Lahorning Kaxna tumanida yashab, mahalliylar orasida o‘yinga berilib ketgan o‘smir sifatida tanilgan.

Yaqinlari uni tez-tez xonasiga yopilib, o‘yin bilan band bo‘lishi uchun tanqid qilgan. Politsiya ma’lumotlariga ko‘ra, Ali topshiriqlarni bajara olmaganda asabiylashib, tajovuzkor holatga o‘tgan.

Jinoyat sodir bo‘lgan kechada ham u o‘yindagi missiyani uddalay olmagach, onasi unga qattiq gapirgach, xonadagi to‘pponchani olib, onasi va singillarining uxlayotgan xonasiga kirib o‘q uzgan. Natijada onasi, akasi Taymur va singillari Maxnur hamda Jannat voqea joyida halok bo‘lgan.

Ushbu voqea mamlakatda katta shov-shuvga sabab bo‘lib, internet o‘yinlarining yoshlar ruhiyatiga salbiy ta’siri haqida jiddiy munozaralar boshlandi. Sud qarorida Alining jinoyatida asosiy omil o‘yinga qaramligi ekanligi qayd etildi.

Huquq-tartibot organlari ota-onalarga farzandlarining virtual olamini diqqat bilan nazorat qilish zarurligini ta’kidladi.