Jeyms Komiga yangi ayblovlar qo‘yildi
Rossiyaning 2016-yildagi AQSH prezidentlik saylovlariga aralashuvi bo‘yicha tergovda asosiy shaxs hisoblangan Federal tergov byurosining sobiq rahbari Jeyms Komiga nisbatan yangi ayblovlar qo‘yildi. Bu haqda Zamin.uz xabar berdi.
Unga yolg‘on guvohlik berish va adolatni to‘sish kabi jiddiy jinoyatlarda ayblovlar bildirilmoqda. Bu haqda 26-sentyabr kuni Amerikaning ABC News telekanali ma’lumot berdi.
AQSHning Virjiniya shtati Sharqiy okrugi federal prokuraturasi Komini 2020-yilda Senat sud qo‘mitasi oldida bergan guvohliklarida yolg‘on ma’lumotlar berganlikda ayblamoqda. U FTBning Donald Tramp saylovoldi shtabi bilan Rossiya o‘rtasidagi aloqalarni tergov qilish jarayonida asossiz ma’lumotlar taqdim etgan.
Ayblov tafsilotlari to‘liq oshkor qilinmagan, ammo huquqshunoslar sobiq rahbar besh yilgacha ozodlikdan mahrum qilinishi mumkinligini ta’kidlamoqda. Jeyms Komi o‘zini aybsiz deb hisoblaydi va bu ishni siyosiy intiqom sifatida baholamoqda.
U ayblovlar ortida sobiq prezident Donald Trampning shaxsiy qasosi borligini bildirgan. Komi oilasi bilan birga Trampga qarshi pozitsiyada turishning narxi borligini bilishini, ammo hech qachon tiz cho‘kib yashashga rozi emasligini aytgan.
Shuningdek, u federal sud tizimining adolatli qaror chiqarishiga umid bildirgan. Komiga qo‘yilgan ayblovlar Virjiniya prokuraturasidagi o‘zgarishlardan keyin yuzaga kelgan.
Tramp avval federal prokuror Erik Sibertni lavozimidan ozod qilgan. Sibert Komiga qarshi jinoiy ish ochish uchun yetarli asos topmagan, uning o‘rniga esa Tramp Oq uyda ishonchli yordamchisi va sobiq advokat Lindsi Halliganni tayinlagan.
Mutasaddilar bu jarayon AQSH siyosiy maydonida yangi tortishuvlarga sabab bo‘lishi mumkinligini ta’kidlashmoqda. Chunki Jeyms Komi nafaqat FTBning sobiq rahbari, balki Tramp ma’muriyati davridagi Rossiyaning saylovga aralashuvi ishining asosiy shaxslaridan biri hisoblanadi.
Ushbu voqea siyosiy maydonda katta e’tibor qozonmoqda.
