Niderlandiyada Rossiya manfaatlari uchun josuslik qilgan ikki nafar 17 yoshli o‘smir hibsga olindi. Bu haqda Zamin.uz xabar berdi.
Bu haqda 26-sentyabr kuni De Telegraaf nashri xabar berdi. Ma’lumotlarga ko‘ra, o‘smirlar 16-avgust kuni Haaga shahrida Yevropol, Yevropa adliya tizimi va Kanada elchixonasi yaqinida o‘tayotganda, ularda internet tarmoqlarini kuzatish, parollarni o‘g‘irlash va boshqa ma’lumotlarni olish uchun mo‘ljallangan maxsus uskuna — Wi-Fi-sniffer borligi aniqlangan.
Tergov jarayonida ularning Telegram messenjeri orqali anonim kurator bilan aloqa o‘rnatgani ma’lum bo‘ldi. Ayblovlar Niderlandiyaning Razvedka va xavfsizlik xizmati tomonidan taqdim etilgan ma’lumotlar asosida ilgari surildi.
Bu holat mamlakat tarixida ilk bor voyaga yetmagan shaxslarning xorijiy davlat tomonidan yollanishi sifatida qayd etilmoqda. 25-sentyabr kuni gumonlanuvchilar sud oldiga olib chiqildi.
Sud qaroriga ko‘ra, ulardan biri 14 kun davomida qamoqda qoldirildi, ikkinchisiga uy qamog‘i va elektron bilaguzuk taqish majburiyati belgilandi. Nashrga ko‘ra, gumonlanuvchilardan biri hali maktab o‘quvchisi bo‘lib, xokkey bilan shug‘ullangan va geymingga qiziqqan.
Uning ota-onalari uchun bu voqea to‘liq kutilmagan bo‘lgan. Yigit bazmlarga qatnashmagan, faqat supermarketda ishlaganligi ma’lum bo‘ldi.
Qo‘lga olish jarayonida kamida sakkiz nafar huquq-tartibot xodimi uyga tintuv orderi bilan kirib, hibs amaliyotini amalga oshirdi. Ushbu voqea nafaqat ota-onalar, balki keng jamoatchilik orasida ham katta hayrat uyg‘otdi.
