Italiyada yashirin sigaret zavodi fosh etildi
Italiyaning Ankona viloyatida Moliyaviy gvardiya tomonidan ilgari hech qachon ko‘rilmagan hajmdagi yashirin sigaret ishlab chiqarish majmuasi aniqlangan. Bu haqda Zamin.uz xabar berdi.
Bu haqda L’Unione Sarda nashri 26-sentyabr kuni xabar berdi. Ma’lumotlarga ko‘ra, yer ostida joylashgan katta bunker aniq va mohirlik bilan yashirilgan bo‘lib, u 1600 kvadrat metrdan ortiq maydonni egallaydi.
Maxfiy zavodga kirish maxsus gidravlik tizim orqali amalga oshirilgan va ishlab chiqarish jarayoni tashqi ko‘zdan to‘liq yashirilgan. Ichkarida zamonaviy uskunalar bilan jihozlangan uchta ishlab chiqarish liniyasi faoliyat yuritmoqda.
Ularning yillik ishlab chiqarish quvvati taxminan 2,7 milliard dona sigaretni tashkil etadi, bu esa kuniga 7,2 million dona mahsulot tayyorlash imkonini beradi. Tekshiruv davomida omborda 150 tonnadan ortiq soxta tamaki, 170 tonnadan ziyod ishlab chiqarish materiallari, yuz minglab filtrlar, millionlab karton qutilar va turli texnik jihozlar topildi.
Zavodning umumiy qiymati 1,75 million yevroga baholangan, ishlab chiqarish quvvati esa daqiqasiga 5 ming sigaret tayyorlash darajasiga yetgan. Tergovchilarni hayratga solgan yana bir jihat — bunkerda ishchilar uchun 18 ta karavot, hammom, dush xonalari, oshxona va ta’mir ustaxonasi mavjud bo‘lib, bu ularning uzluksiz smenada ishlashini ta’minlagan va maxfiy ishlab chiqarishni to‘xtovsiz davom ettirish imkonini yaratgan.
Shuningdek, yaqin atrofda qalbaki mahsulotlarni saqlash uchun ishlatilgan omborxonalar ham topilgan. U yerdan ikki avtomobil va to‘rt yarim tirkama musodara qilingan.
Ushbu avtomobillarda qalbaki sigaretlar jamlangan bo‘lib, ularning umumiy qiymati 620 ming yevroga teng, bozor bahosida esa taxminan 47,4 million yevroni tashkil etadi. Bu holat mamlakatda soxta tamaki mahsulotlariga qarshi kurashning qanchalik muhimligini ko‘rsatadi.
