Qozog‘istonda 2022 yil yanvar oyida yuzaga kelgan tartibsizliklardan keyin yo‘qolgan qurol-yarog‘larning yana bir qismi topildi. Bu haqda Zamin.uz xabar berdi.
Milliy xavfsizlik qo‘mitasining ma’lumotlariga ko‘ra, sentyabr oyida mamlakatning 12 hududida o‘tkazilgan qidiruv ishlari davomida 60 dan ortiq qurol va to‘rt mingdan ziyod o‘q-dori musodara qilindi. Tintuvlar Olmaota va Chimkent shaharlarida, shuningdek, Atirau, Jambil, Qarag‘anda, Qizilo‘rda, Turkiston, G‘arbiy Qozog‘iston va Olmaota viloyatlarida hamda Ulitau, Yettisuv va Abay hududlarida olib borildi.
Topilgan qurollar orasida uchta Kalashnikov avtomati, o‘n olti pistolet, qirq uch ov miltig‘i, to‘rtta granata va minglab o‘q-dori mavjud. Shuningdek, 2022 yil yanvar oyida o‘nga yaqin qurolni o‘g‘irlagan shaxslar aniqlangan, ammo qo‘mita topilgan qurollarning aniq qayerdan va qanday sharoitda chiqqani haqida ma’lumot bermadi.
So‘nggi uch yil davomida huquq-tartibot organlari vaqti-vaqti bilan “Qonli yanvar” voqealari paytida yo‘qotilgan qurol va o‘q-dorilarning bir qismini topib kelmoqda. Masalan, 2023 yil aprel oyida Ichki ishlar vazirligi bir necha yuzlab qurollarni musodara qilgani haqida xabar bergan, biroq ularning barchasi tartibsizliklar vaqtida do‘konlardan o‘g‘irlangan qurollar ekanligini isbotlay olmagan.
Rasmiy ma’lumotlarga ko‘ra, 2022 yildan buyon Milliy xavfsizlik qo‘mitasi jami 608 ta qurolni musodara qilgan. Shu bilan birga, Ichki ishlar vazirligi oldinroq 1700 dan ortiq qurolning taqdiri hanuz noma’lumligini bildirgan edi.
Eslatib o‘tish joizki, 2022 yil yanvar oyida Olmaota va boshqa shaharlarda suyultirilgan gaz narxining oshishi sababli keng ko‘lamli namoyishlar bo‘lib o‘tgandi. Olmaotada bu noroziliklar qurollangan shaxslar ishtirokidagi tartibsizliklarga aylangan va namoyishchilar bilan xavfsizlik kuchlari o‘rtasida keskin to‘qnashuvlar yuzaga kelgan.
Rasmiy ma’lumotlarga ko‘ra, o‘sha kunlarda 238 kishi halok bo‘lgan.
