El Pais nashrining xabar berishicha, Ispaniya hukumati Amerika Qo‘shma Shtatlariga tegishli kema va samolyotlarning mamlakatdagi harbiy bazalari orqali Isroilga qurol olib o‘tishini taqiqladi. Bu haqda Zamin.uz xabar berdi.
Rasmiy ma’lumotlarga ko‘ra, bu taqiq Rota (Kadis viloyati) va Moron-de-la-Frontera (Sevilya viloyati) bazalariga taalluqlidir. Yangi qarorga muvofiq, taqiq nafaqat to‘g‘ridan-to‘g‘ri Isroilga yo‘l olgan kema va samolyotlarga, balki boshqa davlatlarda oraliq to‘xtov qilgan va oxirgi manzili Isroil bo‘lgan harbiy transportlarga ham tatbiq etiladi.
Shu bilan birga, Ispaniya hozircha AQSH harbiy samolyot va kemalarining mamlakat hududida to‘xtaganda ularni tekshirishni amalga oshirmaydi. Tahlilchilarning fikricha, Pentagon yuk mazmunini oshkor qilmasligi mumkin, bu esa ittifoqchilar o‘rtasida ishonchning zaiflashishiga olib kelishi ehtimoldan xoli emas.
So‘nggi paytlarda G‘azo mintaqasidagi vaziyat sababli Ispaniya Isroilga nisbatan qat’iyroq siyosat yuritmoqda. Mamlakat hukumati allaqachon Isroilga qurol-yarog‘ yetkazib berishni to‘xtatgan.
Hozirda bosh vazir Pedro Sanches yangi choralarni taklif qilmoqda. Ular orasida qurol yetkazib berishga to‘liq embargo joriy etish, harbiy jinoyatlarda gumon qilingan Isroil amaldorlarining mamlakatga kirishini taqiqlash, harbiy hamkorlikni bekor qilish va falastinliklarga insonparvarlik yordamini kengaytirish bor.
Bu choralar Ispaniyaning Isroilga nisbatan siyosatini yanada qat’iylashtirishga xizmat qiladi.
