Qozog‘istonda yilning ilk qor yog‘di, yo‘llar muzladi
29 sentyabr kuni ertalab Qozog‘istonning Qo‘stanay tumanida yilning ilk qor yog‘ishi qayd etildi. Bu haqda Zamin.uz xabar berdi.
Qisqa vaqt ichida shahar ko‘chalari va uylar qalin oq qor bilan qoplanib, yo‘llar muzlab, harakat qilish qiyinlashdi. Mahalliy ommaviy axborot vositalari bu holat haqida xabar berdi.
Bir nechta hududlarda elektr ta’minotida uzilishlar yuzaga keldi, shuningdek, ayrim svetoforlar ishlamay qoldi. Bu esa yo‘llarda tirbandlik va harakatning sekinlashishiga sabab bo‘ldi.
Politsiya haydovchilarga ogohlantirib, noqulay ob-havo sharoitida ehtiyotkorlikni oshirish va yo‘l harakati qoidalariga qat’iy rioya qilish zarurligini ta’kidladi. Sinoptiklar 28 sentyabrdan boshlab respublika hududida havo haroratining keskin pasayishi haqida ogohlantirgan edi.
Ularning ma’lumotlariga ko‘ra, mamlakatning janubi-sharqiy hududlarida momaqaldiroq va kuchli shamollar bo‘lishi mumkin. Shimoliy hududlarda esa yomg‘ir yog‘ishi va haroratning sezilarli darajada tushishi kutilmoqda.
Faqatgina Qozog‘istonning janubiy va sharqiy hududlarida nisbatan quruq va barqaror ob-havo saqlanib qoladi. Shu bilan birga, butun respublika bo‘ylab kuchli shamol esishi, tungi va tonggi soatlarda esa tuman paydo bo‘lishi ehtimoli yuqori ekanligi qayd etilmoqda.
Mutaxassislarning ta’kidlashicha, ilk qor kuz faslidagi tabiiy o‘zgarishlarning boshlanishi hisoblanadi va bu holat havo haroratining yanada pasayishidan darak beradi. Shu sababli aholiga va haydovchilarga sovuq va noqulay ob-havoga tayyor turish tavsiya qilinadi.
