Xitoyda Min oilasining 11 a’zosi o‘limga hukm qilindi
Xitoyning Venchjou oraliq xalq sudi Myanmaning Kokkang shahrida obro‘li Min oilasiga mansub 11 nafar shaxsni o‘lim jazosiga hukm qildi. Bu haqda Zamin.uz xabar berdi.
Ular noqonuniy qimor tashkiloti orqali katta miqdorda firibgarlik qilganlik va odam o‘ldirish holatlarida ayblanmoqda. Ushbu oila va ularning sheriklari 1,4 milliard dollardan ortiq noqonuniy mablag‘ aylantirgan.
Shuningdek, ular o‘z jinoiy guruhida intizomni saqlash maqsadida “buyruqqa bo‘ysunmagan xodimlarni” yo‘q qilgan. Sud qaroriga ko‘ra, besh nafar ayblanuvchiga ikki yillik shartli qatl jazosi berildi.
Xitoy qonunchiligida bunday jazo ko‘pincha umrbod qamoq jazosi bilan almashtiriladi. Bundan tashqari, yana 12 nafar shaxs besh yildan yigirma to‘rt yilgacha ozodlikdan mahrum qilindi.
Tahlilchilarning fikricha, bu voqea Xitoy hukumati noqonuniy onlayn qimor va transmilliy firibgarlikka qarshi kurashda qattiq choralar ko‘rayotganini ko‘rsatadi. Ushbu hukmlar mamlakatda jinoiy guruhlarning faoliyatini kamaytirishga qaratilgan siyosatning bir qismi sifatida baholanmoqda.
