Ashraf Mahruz 700 tonna kemani tish bilan tortdi

Misrlik 44 yoshli kurashchi Ashraf Mahruz odamlarning ishonishiga qiyin bo‘lgan ishni amalga oshirdi. Bu haqda Zamin.uz xabar berdi.

U tishlari bilan 700 tonnalik katta kemani 15 metrga tortib oldi. Bu haqda NBC News xabar berdi.

Mahruz o‘zining bu natijasini rasmiy ravishda Ginness rekordlar kitobiga kiritish uchun ariza berishini ma’lum qildi. Hozirgi vaqtda eng yuqori ko‘rsatkich sifatida 614 tonnalik kema qayd etilgan.

Sportchi yangi rekordni tasdiqlash uchun foto va video materiallarni taqdim etishni rejalashtirmoqda. Tayyorlanish jarayonida u oqsil va temirga boy mahsulotlar bilan oziqlangan.

Har kuni kamida 12 dona tuxum, ikki butun tovuq va taxminan 5 kilogramm baliq iste’mol qilgan. Mashqlarini esa kuniga uch mahal, har biri ikki soatdan bajargan.

Ashraf Mahruzning bu yutuqlari birinchi emas. U ilgari ham mashinalar, poyezd va lokomotivlarni joyidan siljitgan.

Shu yilning mart oyida esa 279 tonnalik temir yo‘l vagonini siljitib, Ginness rekordlar kitobiga kiritilgan edi. Uning sportdagi yuksak natijalari ko‘plab insonlarga ilhom manbai bo‘lmoqda.