Saudiyada Donald Tramp nomidagi osmono‘par bino qurilmoqda
Saudiya Arabistonida Donald Tramp sharafiga yangi yirik osmono‘par bino qurilishi boshlandi. Bu haqda Zamin.uz xabar berdi.
Dar Global kompaniyasi Trump Organization bilan hamkorlikda Jidda shahri markazida Trump Plaza Jeddah nomli loyihani amalga oshirmoqda. Ushbu majmua bir milliard dollarlik investitsiya evaziga barpo etilmoqda.
Unda yuqori sifatli turar joylar, zamonaviy apartamentlar, A toifali ofislar hamda eksklyuziv taunxauslar joylashadi. Trump Organization ijrochi vitse-prezidenti Erik Trampning so‘zlariga ko‘ra, Trump Plaza Jeddah loyihasi Saudiya Arabistonidagi faoliyatni kengaytirishga xizmat qiladi.
U mehmonxona xizmatlari, qulay turmush sharoitlari va rivojlangan biznes muhitini birlashtirgan dunyo darajasidagi inshoot yaratishni maqsad qilganini ta’kidladi. Loyiha aniq ishga tushish sanasi hozircha e’lon qilinmagan.
Saudiya Arabistoni ko‘chmas mulk bozorining tez o‘sishi fonida loyiha amalga oshirilmoqda. Faqat 2024 yilda mamlakatda milliondan ortiq yangi uylar hamda yetti million kvadrat metrdan ziyod savdo va ofis binolari qurilishi uchun 1,3 trillion dollar sarmoya ajratilgan.
Bundan tashqari, Tramp oilasi Saudiyada Trump Tower Jeddah nomli yana bir osmono‘par majmua qurilishiga ham boshchilik qilmoqda. Ushbu hashamatli bino Qizil dengiz sohilida joylashgan bo‘lib, 2028 yilda foydalanishga topshirilishi rejalashtirilgan.
Donald Trampning ikkinchi prezidentlik davrida arab davlatlari uning e’tiborini jalb qilish uchun tijorat loyihalari va katta sarmoyalarni amalga oshirmoqda. 2023 yil may oyida Riyozda Saudiya va AQSH o‘rtasida 600 milliard dollarlik shartnomalar imzolangan.
Shuningdek, qo‘shni Qatar davlatidan Trampga 400 million dollarlik hashamatli samolyot sovg‘a qilingani haqida xabarlar tarqaldi. Bu holatlar Trampning mintaqadagi iqtisodiy va siyosiy ta’sirini yanada mustahkamlashga xizmat qilmoqda.
