Turkiyada 11 ming yillik neolit qabri topildi
Turkiyada arxeologlar tomonidan 11 ming yil oldingi neolit davriga oid qabr topildi. Bu haqda Zamin.uz xabar berdi.
Bu haqda Arkeonews xabar berdi. Qazishmalar davomida jami oltita qabr ochilgan bo‘lib, ulardan beshtasi ilk bronza davriga, bittasi esa neolit davriga tegishli ekanligi aniqlangan.
Tadqiqotlar Chanoqqal’a universiteti amaliy fanlar fakulteti dotsenti Savash Sarialtun rahbarligida olib borildi. May oyida boshlangan qazishmalar besh oy davom etdi va natijada me’moriy yodgorliklar hamda qabrlar topildi.
Sarialtunning so‘zlariga ko‘ra, bu topilmalar Chayonyu aholisining ko‘chmanchi hayotdan qishloq xo‘jaligini rivojlantirish va murakkab jamiyat qurishga qanday o‘tganini tushunishga yordam beradi. Chayonyu hududi Tigr daryosi yaqinida joylashgan bo‘lib, ilk qishloq xo‘jaligi yodgorliklaridan biri sifatida 1964 yildan beri qazishmalar olib borilmoqda.
Bu yerda ilk aholining o‘simlik va hayvonlarni xonakilashtirgani, miloddan avvalgi 10 ming yillarda esa ko‘chmanchilik hayotidan voz kechgani ma’lum. Arxeologlar 1964 yildan boshlab bu hududda 600 dan ortiq inson skeletini topgan, ularning aksariyati neolit davriga oid.
Yangi topilgan oltita qabr esa neolit va ilk bronza davri orasidagi xronologik bo‘shliqni to‘ldirishda muhim ahamiyatga ega. Ushbu topilmalar tarixiy jarayonlarni yanada chuqurroq o‘rganishga imkon yaratadi.
