AQSh fuqarosi O‘zbekistonda avtomobilini chiqarolmayapti
O‘zbekistonda yuzaga kelgan g‘ayrioddiy holat mahalliy va xalqaro jamoatchilik e’tiborini tortdi. Bu haqda Zamin.uz xabar berdi.
Ijtimoiy tarmoqlarda tarqalgan videomurojaatda AQSh fuqarosi o‘zining “Lamborghini” avtomobili bilan mamlakatdan chiqib keta olmasligini bildirgan. Bu holat yuzasidan Bojxona qo‘mitasi raisining matbuot kotibi rasmiy izoh berdi.
Ma’lum qilinishicha, xorijiy fuqaro boshqaruvidagi qimmatbaho sport avtomobili O‘zbekistonda belgilangan muddatdan deyarli ikki oy ko‘proq qolgan. Shu sababli avtomobilni mamlakatdan chiqarish vaqtincha taqiqlangan va muammoni hal etish uchun to‘lov talab qilingan.
Bojxona organlarining ma’lumotlariga ko‘ra, amerikalik haydovchi 23 million 72 ming so‘m miqdoridagi yig‘imni to‘lab, ma’muriy javobgarlikdan ozod etilgan. Barcha rasmiylashtirish ishlari tugagach, u o‘zining “Lamborghini”si bilan O‘zbekiston hududidan chiqib ketishiga ruxsat olgan.
Shuningdek, bank amaliyotlari jarayonida qiyinchiliklar yuzaga kelgan. Dam olish kunlari xorijiy shaxs valyuta almashtirish va naqd pul olish imkoniga ega bo‘lmagan.
Natijada barcha jarayonlar kechikib, masala bir muddatdan so‘ng hal qilingan. Amaldagi qonunchilikka ko‘ra, xorijiy avtotransport vositalari O‘zbekiston hududida 90 kundan ortiq qolishi mumkin emas.
Ushbu avtomobil 2025 yil 2 mayda mamlakatga kirib, chiqarish muddati 2 avgustga belgilangan edi. Xorijiy fuqaro bu haqda ogohlantirilgan bo‘lsa-da, qoidalarga rioya qilmagani uchun jarima qo‘llanilgan.
Mutasaddilar ta’kidlashicha, bunday holatlar qonun oldida tenglik tamoyilini yana bir bor eslatadi. Qoidalarni buzish nafaqat mahalliy aholi, balki chet elliklar uchun ham bir xil javobgarlikni keltirib chiqaradi.
