Xitoyda sud tarixda kamdan-kam uchraydigan qat’iy qaror qabul qildi. Bu haqda Zamin.uz xabar berdi.
Myanmaning Laukkay shahrida jinoiy tarmoqlarni boshqarib kelgan, Minglar familiyasiga mansub mashhur mafiya oilasining 11 nafar a’zosi o‘lim jazosiga hukm qilindi. Bu haqda BBC o‘z manbalariga tayangan holda xabar berdi.
Ma’lumotlarga ko‘ra, Ming oilasi uzoq yillar davomida qimorxona, giyohvandlik va firibgarlik markazlarini nazorat qilib, milliardlab dollar aylanmasini boshqargan. Ularning faoliyati butun mintaqada xavfli qudrat shakllantirgan.
Ikki yil oldin isyonchi guruhlar shaharni egallab olgach, oila boshlig‘i o‘z joniga qasd qilgan. Shundan so‘ng, mafiya a’zolarining ko‘pchiligi Myanma hukumati tomonidan Xitoyga topshirilgan.
29 sentyabr kuni Venjou shahrida bo‘lib o‘tgan sud jarayonida jami 39 kishi turli jazo turlariga hukm qilindi. Ulardan 11 kishi o‘lim jazosiga, 5 kishi kechiktirilgan o‘limga, 11 kishi umrbod qamoqqa mahkum etildi.
Qolganlari esa 5 yildan 24 yilgacha ozodlikdan mahrum qilindi. Sud hujjatlariga ko‘ra, Ming oilasi 2015 yildan beri jinoyatlar bilan shug‘ullanib kelgan.
Ular boshqaradigan qimorxonalarda va firibgarlik markazlarida ishchilarga nisbatan shafqatsizlik qo‘llanilgan, ba’zilari qiynoqlar ostida halok bo‘lgan. Mutaxassislar bunday jinoiy tarmoqlarni xalqaro tashkilotlar, xususan BMT tomonidan “qalloblik industriyasi” deb atashini ta’kidlaydi.
Bu tarmoqlarda ko‘plab odamlar aldov yo‘li bilan tuzoqqa tushirilib, noqonuniy ishlarga majbur qilinadi. Xitoy sudi tomonidan chiqarilgan hukm nafaqat jinoyatchilarga nisbatan qat’iy chora sifatida, balki xalqaro hamjamiyatga ham signal bo‘lib xizmat qiladi.
Katta jinoyatlar jazosiz qolmasligi kerakligi ta’kidlanmoqda.
